“საქართველო მაჩანჩალა არ არის, საქართველოს ხელისუფლება ჰყავს დღეს მაჩანჩალა” – გიორგი გახარია

ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” საუბრობს აშშ-ის მხრიდან შეწყვეტილ მორიგი დახმარების პაკეტთან დაკავშირებით:

,,პირველ რიგში, საქართველოს რომც ჰქონდეს საკმარისი ფული, იგი ზედმეტი არასოდეს არ არის. განსაკუთრებით ფული, რომელსაც შენ უანგაროდ გაწვდიან შენი სტრატეგიული მეგობრები. Covid-ს რომ თავი დავანებოთ, Covid-მდე იყო ელიმინაციის პროგრამა, რომელსაც ბატონი თენგიზ ცერცვაძე ხელმძღვანელობდა. ის, რომ დღეს საქართველოში, მთლიანად რეგიონში, შიდსის პრობლემა არის ასეთ დაბალ დონეზე, ეს მისი და ამ დახმარების დამსახურებაა.

ის, რომ C-ჰეპატიტის უნიკალური პროგრამა, ესეც ბატონმა თენგიზმა დაიწყო, მისი უდიდესი ავტორიტეტის და საერთაშორისო კავშირების, სხვათაშორის, წყალობით მოხდა ეს ყველაფერი. რა თქმა უნდა, კოვიდის დროსაც ეს დახმარება.

ყველაზე ცუდი არის უმადური ადამიანი. ერთმა საქართველოს ხელისუფლების ამომავალმა ვარსკვლავმა ბრძანა, რომ ,,საქართველო მაჩანჩალა არ არისო”. საქართველო მაჩანჩალა არ არის, საქართველოს ხელისუფლება ჰყავს დღეს მაჩანჩალა. ისეთი მაჩანჩალა ხელისუფლება ჰყავს, რომელსაც ხელს არავინ არ ართმევს უკვე, ვერსად ვერ მიდიან, ვერავისთან სერიოზულად ვერ ლაპარაკობენ და ერთმანეთს ელაპარაკებიან”, – განაცხადა გიორგი გახარიამ.

ავტორი
ნინი ხიჯაკაძე