საქართველოს პარლამენტთან მიმდინარე საპროტესტო აქციაზე, „ახალი საქართველოს“ თავმჯდომარე გიორგი ვაშაძემ რამდენიმე განცხადება გააკეთა. გაერთიანებული ოპოზიციის ერთ-ერთი ლიდერი აპროტესტებდა გენერალური პროკურორის თანამდებობაზე ირაკლი შოთაძის წარდგენას. ამასთან გიორგი ვაშაძე, საზოგადოებისა და სხვა ოპოზიციური პარტიების წარმომადგენლებთან ერთად, აპროტესტებდა ქვეყანაში არსებულ რთულ ვითარებას.
„როგორც გავიგე შოთაძე დღეს აღარ მოყავთ, რაც ძალიან კარგია. ჩვენ მშვიდობიან პროტესტს ყოველთვის აქვს აზრი და ვაგრძელებთ ამ მშვიდობიან პროტესტს.
4 აპრილს იქნება დიდი შეკრება რუსთაველზე და ყველას მოვუწოდებ, რომ გავერთიანდეთ. გავერთიანდეთ იმიტომ, რომ საქართველო არ მოექცეს საერთაშორისო იზოლაციაში, იმისათვის რომ „ქართულმა ოცნებამ“ გაიგოს ჩვენ ძლიერები ვართ, ერთიანები და ქართველ კაცს ღირსებას ვერ წაართმევს ვერცერთი პოლიტიკური ძალა.
ამასთანავე ძალიან მნიშვნელოვანია, რომ გავაგრძელოთ ქვეყნის განვითარებაზე, აღმშენებლობაზე ფიქრი. ჩვენ, ოპოზიციური პარტიები, ყოველკვირეულად, ყოველდღიურად უკვე ვმუშაობთ გეგმის შედგენაზე, თუ როგორ გამოვიყვანთ სწრაფად კრიზისიდან ქვეყანას, არჩევნებზე “ქართული ოცნების” დამარცხების შემდეგ,” – განაცხადა გიორგი ვაშაძემ.
ოპოზიციონერმა ლიდერმა კიდევ ერთხელ შეახსენა საზოგადოებას 4 აპრილს დაგეგმილი აქციის მნიშვნელობა და განაცხადა, რომ ეს იქნება მასშტაბური აქცია, სადაც ოპოზიცია ერთობლივად შემუშავებულ გეგმას წარუდგენს საზოგადოებას.
„4 აპრილს იქნება დიდი საპროტესტო აქცია და დარწმუნებული ვარ, რომ ბევრი ხალხი შემოგვიერთდება. აქ ჩვენ განვაცხადებთ ოპოზიციის საერთო სამოქმედო გეგმას სარჩევნო თვალსაზრისით, როგორ ვიმუშავებთ არჩევნებზე და როგორ ვითანამშრომლებთ ერთმანეთთან იმისათვის, რომ ის ძალა, რომელიც არის „ქართული ოცნება“ მოვაშოროთ ქვეყანას,“ – აღნიშნა გიორგი ვაშაძემ.
ავტორი
თამთა ასლანიშვილი
