“ნიღაბი ჩამოხდილია! დღეს ერთ მხარეს არის პრორუსული ხელისუფლება, მეორე მხარეს – თავისუფლად მოაზროვნე ადამიანები” – გია ხარჩილავა

წალენჯიხის მერი, გია ხარჩილავა სააგენტო ,,პარალელთან” ინტერვიუში შეფასებას ახდენს ,,ქართული ოცნების” მიერ ორგანიზებულ სახალხო-ევროვნულ შეკრებასა და პარალელურ ფონზე, პარლამენტში მიმდინარე ე.წ. ,,რუსული კანონის” მეორე მოსმენით განხილვასთან დაკავშირებით:

,,საქართველოს მოსახლეობა არაერთ გამოკითხვაში მუდმივად აფიქსირებდა პროდასავლურ კურსს და ეს მაჩვენებელი 80-85%-მდე მერყეობს. ეს გახლდათ წლების განმავლობაში საქართველოს მოსახლეობის ურყევი ნება და გამოხატული მიზნები. სწორედ ამ 85%-ს, საკუთარი მოსახლეობის, აბსოლუტური უმრავლესობის ნებას ,,ქართული ოცნება” უპირისპირდება. ამასთან მმართველი პარტია კონსტიტუციას არღვევს. კონსტიტუციის 78-ე მუხლი მკაფიოდ გვეუბნება, რომ ჩვენი კურსია დასავლური და სახელმწიფო ორგანოებმა ყველაფერი უნდა გააკეთონ იმისთვის, რომ საქართველო ევროკავშირის წევრი გახდეს.

ახლა იმ დარბაზში საკუთარ მოქალაქეებზე და კონსტიტუციაზე ძალადობა ხდება. ხელისუფლების მეორე მხარეს არის მოსახლეობის აბსოლუტური უმრავლესობა, მაგრამ ვერცერთ სცენარში მათ ვერ გათვალეს პოლიტიკაში ახალგაზრდების ადგილი.

აი ახალგაზრდობა გამოხატავს იმ 85%-ის ნებას დღეს ქუჩებში. მათ გვერდით არიან მათი მშობლები, თანამოაზრეები. ამიტომ ეს აქციები იქნება უწყვეტი, სანამ ხელისუფლება ამ კანონს არ გაიწვევს.

ის ადამიანები, რომლებიც ამ აქციაზე მოდიან რუსეთის მხარდასაჭერად და ევროპის კურსის საწინააღმდეგოდ, ტიპიურ ქართულ ღალატთან გვაქვს საქმე! ის ადამიანები, რომლებიც აქციაზე მოდიან იმის შიშით, რომ ხელფასს ან თანამდებობას დაკარგავენ, ტიპიურ გამყიდველობასთან გვაქვს საქმე! ის ადამიანები, რომლებიც აქციაზე მოდიან იმ აზრით, რომ დასავლეთი იდენტობას, ეროვნებას გვიკარგავს, რაღაც პროპაგანდებს თავზე გვახვევენ, ამ შემთხვევაში, აბსოლუტურ უმეცრობასთან გვაქვს საქმე. თუ ის ადამიანები მოდიან 2012 წლის იდეალებით და აღმოჩნდა, რომ ცრუ იდეალებია. დროში ხომ გაირკვა, რომ 12 წლის განმავლობაში ,,ოცნება” ატყუებს ხალხს. მათი გულწრფელობა თუ მისაღებია, ამ ადამიანების ადგილი მართლაც რუსთაველზეა, მაგრამ ეს არის სიყალბის არაღიარება. იმიტომ, რომ 12 წლის განმავლობაში ,,ოცნებამ” ანახა, რომ ის ეთამაშებოდა საკუთარ ხალხს და იყო არაგულწრფელი.

დღეს ნიღაბი ჩამოხდილია! დღეს ერთ მხარეს არის პრორუსული ხელისუფლება, მეორე მხარეს – თავისუფლად მოაზროვნე ადამიანები, რომელთაც საკუთარი სამშობლო ევროპაში ეგულებათ.

ამ ახალგაზრდებს უნდათ ევროპა. თუ ევროპა აქ არ მივიღეთ, ეს ახალგაზრდები წავლენ ევროპაში. ჩვენ გვინდა, რომ ახალგაზრდები წავიდნენ ევროპაში თუ ევროპა მოვიდეს აქ და ევროპაში მყოფი ემიგრაცია დაბრუნდეს საქართველოში?! ჩვენ გვინდა რომ ევროპა იყოს აქ”, – განაცხადა გია ხარჩილავამ.

ავტორი
ნინი ხიჯაკაძე