სტრატეგია „აღმაშენებლის“ ფარგლებში რიგით მერვე პრეზენტაცია გაიმართა, სადაც 5 პუნქტიანი გეგმა წარადგინეს, რომელიც მომავალი 4 წლის განმავლობაში ქვეყანაში ტექნოლოგიური მიმართულებით განვითარებასა და 30000 სამუშაო ადგილის შექმნას ითვალისწინებს. „ახალი საქართველოს“ თავმჯდომარე და სტრატეგია „აღმაშენებლის“ ავტორი გიორგი ვაშაძე განმარტავს, რომ აღნიშნული პროექტი ქვეყნის განვითარებას შეუწყობს ხელს:
„ტექნოლოგიები, რის გარეშეც თანამედროვე განვითარება ფაქტობრივად აღარ არსებობს. ტექნოლოგიები, რისი მეშვეობითაც ყველა განვითარებული თუ განვითრებადი ქვეყანა აღწევს ძალიან დიდ წარმატებას. სამწუხარო ფაქტია, რომ საქართველო, რომელიც რეგიონში ლიდერი იყო ტექნოლოგიური განვითარების კუთხით, განსაკუთრებით საჯარო სექტორში და მას უკვე ეწეოდა კერძო სექტორიც, დღეს შეგვიძლია ვთქვათ, რომ ძალიან სერიოზულად ჩამოვრჩებით იგივე სომხეთს, აღარაფერს ვამბობ უკრაინაზე, ბელორუსზე, აზერბაიჯანზე. „საქართველო რეგიონის ტექნოლოგიური დედაქალაქი“ – ეს პროექტი გულისხმობს დაახლოებით 30000-მდე სამუშაო ადგილის შექმნას, შემდეგ ოთხ წელიწადში, რისთვისაც ჩვენ მართლაც ამბიციური გეგმა შევიმუშავეთ’’, – განაცხადა გიორგი ვაშაძემ.
სტრატეგია „აღმაშენებლის“ პრეზენტაციაზე აქცენტი ქვეყნის სტაბილური განვითარებისა და წარმატების გარანტიებზე, სამეცნიერო ინოვაციებზე, ტექნოლოგიებსა და განათლების ხარისხზე გაკეთდა, რადგან ცოდნის კაპიტალი პირდაპირ კავშირშია ქვეყნის ეკონომიკურ განვითარებასთან. სტრატეგიის გუნდის მიერ მომზადებული 5 მეგა პროექტი ქვეყანაში წარმოებას გააძლიერებს, უცხოურ ინვესტიციებს მოიზიდავს და რაც მთავარია ახალგაზრდა ტალანტების ქვეყანაში დასაქმებას შეუწყობს ხელს.
ავტორი
თამთა ასლანიშვილი