საპარლამენტო უმრავლესობის წევრ კარლო კოპალიანს დეპუტატის უფლებამოსილება ვადაზე ადრე შეუწყდა. ამ გადაწყვეტილების მიზეზი, ტექნიკური უნივერსიტეტის კანცლერად მისი არჩევა გახდა. გამოსათხოვარი სიტყვით მიმართა პარლამენტს კარლო კოპალიანმა და “მადლობების კორიანტელი” დააყენა ყველა მიმართულებით:
„მე მინდა, ბატონებო, ამ დარბაზში პრეცედენტი შევქმნა, როდესაც პარლამენტს ტოვებს გუნდის წევრი არა გაბრაზებული, არამედ მადლიერებით აღვსილი რა მინდა, რომ ეს პრეცედენტი მაგალითად იქცეს მომავალში.
სამადლობელო იქნება ჩემი გამოსვლის ლაიტმოტივი.
უპირველეს ყოვლისა მინდა მადლობა ვუთხრა ცაგერის მუნიციპალიტეტის ამომრჩეველს, რომელმაც 2008 წელს გამბედაობა გამოიჩინა და ოპოზიციონერ კანდიდატს მისცა ხმა. მე მათთვის ამ 12 წლის განმავლობაში არასდროს მიღალატია.
მადლობა მინდა ვუთხრა ჩვენს მედიას, ჩვენს ჟურნალისტებს ობიექტური და მართალი ინფორმაციის მიწოდებისთვის.
მადლობა ჩვენს მთავრობას, ძალიან მაგარ პრემიერ-მინისტრ ბატონ გიორგი გახარიას და მის კაბინეტს.
მადლობა პარლამენტს, ჩემს კოლეგებს.
მადლობა ბატონ ბიძინას, იმ ადამიანს, ვინც ეს ყველაფერი შექმნა ჩვენ ირგვლივ. მადლობა კაცს, რომელმაც შეძლო და საქართველოში პირველად, არჩევნების გზით, შეცვალა მოძალადე ხელისუფლება. ადამიანს, რომელმაც ერთ-ერთმა პირველმა დამიძახა თავის დროზე და მომცა შანსი, ვყოფილიყავი იმ ხალხის გვერდით, ვინც დააფუძნა „ქართული ოცნება“. მადლობა მას ამ შესაძლებლობისა და 7 წლისათვის, რომ მომეცა საშუალება ჩემი მოკრძალებული სიტყვა მეთქვა ქართულ პოლიტიკაში.
მადლობა „ქართული ოცნებისა“ და ჩვენი ქვეყნის უპირობო ლიდერს, ბატონ ბიძინა ივანიშვილს, კახის, ირაკლის, დიტოს, ჩვენს პარტიულ ოფისს, ჩვენს ყველა თანამოაზრეს,” – ასე მიმართა კარლო კოპალიანმა დეპუტატებს.
ავტორი
ბეჟან ბერულავა
