თბილისის საქალაქო სასამართლომ არასრულწლოვანი შვილების მიმართ განხორციელებული ფიზიკური, ფსიქოლოგიური და სექსუალური ძალადობის ფაქტზე ბრალდებული ერაყის რესპუბლიკის მოქალაქე მ.ა. დამნაშავედ ცნო.
“სასამართლოში წარდგენილი მტკიცებულებებით დადასტურდა, რომ მ.ა., რომელიც 2013 წლიდან არასრულწლოვან ქალიშვილებთან ნ.ა-სთან და ბ.ა-სთან ერთად საქართველოში ცხოვრობს, 2018 წლიდან მათ სიტყვიერ შეურაცხყოფას აყენებდა, აიძულებდა ემუშავათ და აღებული ხელფასი სრულად გადაეცათ მისთვის. სკოლის მოსწავლე ბ.ა. მამის მხრიდან ფსიქოლოგიურ ტანჯვას განიცდიდა, რის გამოც 2018 წლის ზამთარში, სამსახურში ყოფნის დროს დაზიანებები მიაყენა საკუთარ თავს.
2018 წლის ზაფხულში კი გადაწყვიტა, რომ სამსახურისთვის თავი დაენებებინა, რის პასუხადაც მამისგან ფიზიკური ჭრილობები მიიღო.
გოგონა მკურნალობის მიზნით საავადმყოფოში იქნა გადაყვანილი.
სასამართლო პროცესზე წარდგენილი მტკიცებულებებით დადგინდა, რომ 2018 წლის მაისიდან მ.ა. აიძულებდა არასრულწლოვან შვილებს დამორჩილებოდნენ მას და მათზე სექსუალური ხასიათის ქმედებებს ახორციელებდა, უარის თქმის შემთხვევაში კი ფიზიკურ შეურაცხყოფას აყენებდა.
სამართალდამცველებმა მ.ა. 2019 წლის 1 მაისს ქ.თბილისში დააკავეს. მას ბრალდება საქართველოს სისხლის სამართლის კოდექსის 1261-ე მუხლის მე-2 ნაწილის „ა“ და „ბ“ ქვეპუნქტებით , ასევე 1261-ე მუხლის მე-2 ნაწილის „ა“ და „გ“ ქვეპუნქტებით და 111,139-ე მუხლის მე-3 ნაწილის „დ“ ქვეპუნქტით გათვალისწინებით აღკვეთის ღონისძიების სახით პატიმრობა შეეფარდა.
თბილისის საქალაქო სასამართლომ მ.ა. დამნაშავედ ცნო წარდგენილ ბრალდებაში და სასჯელთა ერთობლიობით 6 წლით თავისუფლების აღკვეთა განესაზღვრა”, – ნათქვამია საქართველოს პროკურატურის მიერ გავრცელებულ განცხადებაში.
ავტორი
თეო იორდანიშვილი