კომუნიკაციების კომისიამ „რუსთავი 2“ ეთერში არასრულწლოვანთათვის შეუფერებელი პროგრამის კანონდარღვევით განთავსებისთვის წერილობით გააფრთხილა. კერძოდ, კომუნიკაციების კომისიაში შემოსული განცხადების თანახმად, 2024 წლის 21, 22 და 27 იანვარს, საღამოს 20:00-21:00 საათებში, ტელევიზიის ეთერში გავიდა ძალადობის ამსახველი სცენების შემცველი სერიალი, სადაც ახლო კადრით ნაჩვენები იყო ადამიანისთვის ზიანის მიყენებისა და მკვლელობის ეპიზოდები.
აღნიშნულ შეტყობინებასთან დაკავშირებით, ComCom-მა მაუწყებლის ეთერის მონიტორინგი განახორციელა, რის შედეგადაც, „მაუწყებლობის შესახებ“ საქართველოს კანონის დარღვევა გამოიკვეთა. „მაუწყებლობის შესახებ“ საქართველოს კანონი, ტელევიზიებს აკისრებს ვალდებულებას დაიცვან არასრულწლოვნების ინტერესები და 18 წლამდე ასაკისთვის შეუფერებელი პროგრამა 06:00 საათიდან 00:00 საათამდე დროის მონაკვეთში სამაუწყებლო ბადეში არ განათავსონ, ვინაიდან, აღნიშნულმა პროგრამებმა შესაძლოა ზიანი მიაყენონ მოზარდის ფიზიკურ თუ ფსიქიკურ ჯანმრთელობას. ამასთან, ტელევიზია ვალდებულია დაიცვას ასაკობრივი ნიშანდების წესები.
გამომდინარე იქიდან, რომ „რუსთავი 2“-ის მხრიდან ბოლო ერთი წლის განმავლობაში მსგავსი დარღვევა არ დაფიქსირებულა, ComCom-მა მაუწყებელი წერილობით გააფრთხილა.
ინფორმაციას კომუნიკაციების კომისია საზოგადოებასთან ურთიერთიერთობის სამსახური ავრცელებს
