“დღეს მე ბევრად უფრო მეტი სარგებელი მომაქვს ქვეყნისთვის აქ, ოპოზიციაში, ვიდრე – რომ დავრჩენილიყავი მაშინ მთავრობაში” – გიორგი გახარია

ყოფილი პრემიერ-მინისტრი, პარტია ,,საქართველოსთვის“ თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში“ მისი პრემიერის თანამდებობიდან გადადგომის 3 წლის თავზე პოლიტიკურ შეფასებას ახდენს და კონკრეტულ განმარტებებს აკეთებს იმასთან დაკავშირებით, თუ რა მიზეზები და პოზიციები არსებობდა აღნიშნული გადაწყვეტილების მიღებისას:

,,მე არ მჭირდება წარსულის გახსნება ან გამოყენება, განსაკუთრებით წინასაარჩევნო პერიოდში, რომ ჩვენს მიზანს მივაღწიოთ. მე ყოველთვის ვცდილობ, ამ საფრთხეებს გვერდი ავუარო – არა, მე არაფერი დასამალი არ მაქვს. სწორედ ამიტომ, აქედან გამომდინარეობდა ჩემი მოწოდება/მოთხოვნა, რომ ივანიშვილი დამჯდარიყო დებატებში.

იმ ღამეს [თანამდებობიდან გადადგომის საკითხთან დაკავშირებით] მთავრობის და პოლიტიკური საბჭოს უმრავლესობა, ჩემ აზრს იზიარებდა. ისინი მეთანხმებოდნენ ზუსტად იმაში, რა მოსაზრებით და ნაბიჯების გადადგმასაც ვაპირებდი. ჩემი გადაწყვეტილების შემდგომ რომ უნდა გადავმდგარიყავი, მთავრობის მნიშვნელოვანი ნაწილი ჩემთან ერთად აპირებდა გადადგომას. ამ ტალღაზე იყო ეს ხალხი და მე, პირიქით – ვინმე სხვა გადამეყენებინა კი არა, ეს ხალხი გავაჩერე. ამათ ვუთხარი, რომ ,,ნებისმიერი მსგავსი ნაბიჯი, დღეს, იმ მომენტში, ქვეყანას დააზიანებდა”. მე ასე ვუყურებდი მაშინ და ასე ვუყურებ ახლაც.

არ შეიძლება ჩვენ არ გავითვალისწინოთ სახელმწიფოს ინტერესები. არ შეიძლება ჩვენი ნაბიჯები, პერსონალური ინტერესით, პოლიტიკური ან არაპოლიტიკური ამბიციებით ქვეყანა და ქვეყნის ინსტიტუტები დავაზიანოთ. სამწუხაროდ, ბოლო 3 წელიწადში ეს ინსტიტუტები უბრალოდ ფეხქვეშ გაითელა.

[ჟუნალისტის შეკითხვა] დღევანდელი გადმოსახედიდან, თქვენ თვლით, რომ ოპოზიციაში უფრო სასარგებლო ხართ და არანაირი რესურსი იქ [,,ქართულ ოცნებაში”] დარჩენის არ არსებობდა? – თქვენ გითქვამთ, რომ შემაკავებლის ფუნქციას ასრულებდით.

კომპრომისის რესური უკვე აღარ იყო. მე მომსახურე პერსონალი ვერ გავხდებოდი. ეს ვერასოდეს ვერ იქნებოდა, ასე ვთქვათ, ჩემი საქმიანობის მიზანი. ამიტომ დარწმუნებული ვარ, რომ დღეს მე ბევრად უფრო მეტი სარგებელი მომაქვს ქვეყნისთვის აქ, ოპოზიციაში, ვიდრე რომ დავრჩენილიყავი მაშინ მთავრობაში, რაც, რა თქმა უნდა, შესაძლებელი იყო. ეს შესაძლებელი იყო ისეთი კომპრომისების ხარჯზე, რომ იქ ყველანაირი ფასეულობა და ღირსება იქნებოდა გადახაზული. სამწუხაროდ, შეხედეთ, დღეს ეს ყველაფერი ძალიან კარგად ჩანს“, – განაცხადა გიორგი გახარიამ.

ავტორი
ნინი ხიჯაკაძე