კომუნიკაციების კომისიამ მედიაში სიძულვილის ენის, ტერორიზმისკენ მოწოდებისა და უხამსობის რეგულირების შესახებ შემუშავებული სახელძღვანელო ევროკომისიას, მაუწყებლებსა და არასამთვრობო ორგანიზაციებს უკუკავშირის მიზნით გაუზიარა. კომენტარების მიღების შემდგომ, კომისია საბოლოო დოკუმენტს დაამტკიცებს. ComCom-მა სახელმძღვანელო „მაუწყებლობის შესახებ“ საქართველოს კანონში შეტანილი ცვლილებებიდან გამომდინარე შეიმუშავა, რომლის მიხედვით, მედიაში სიძულვილის ენა, ტერორიზმისკენ მოწოდება და უხამსობა კომისიის რეგულირების ქვეშ შევიდა. აღნიშნული სახელმძღვანელოს შექმნას მხარი ევროკავშირმა და არასამთავრობო ორგანიზაციებმა დაუჭირეს.
გამომდინარე იქიდან, რომ მნიშვნელოვანია კომისიის მიდგომა ნათელი და განჭვრეტადი იყოს, სახელმძღვანელო მაუწყებლებსა და აუდიოვიზუალური მომსახურების მიმწოდებელ კომპანიებს გაუმარტივებს სამუშაო პროცესს და დეტალურად განუმარტავს კანონის შინაარსს. კერძოდ, დოკუმენტში ახსნილია თუ როგორ აღასრულებს კომისია ნორმებს, როგორ განიმარტება თითოეული მათგანი, რა პასუხისმგებლობის ზომა შეიძლება დაეკისროთ დამრღვევ კომპანიებს და როგორი იქნება პროცედურა. სახელმძღვანელოში ასევე მოყვანილია შესაბამისი პრაქტიკული მაგალითებიც.
აღსანიშნავია, რომ ComCom-ში სახელმძღვანელო დოკუმენტების შემუშავება აპრობირებული პრაქტიკაა და მსგავსი დოკუმენტები პროდუქტის განთავსების, სოციალური რეკლამისა და სპონსორობის შესახებ უკვე არსებობს. აღნიშნული ასევე გავრცელებული პრაქტიკაა ევროპაში, მათ შორის, ბრიტანეთის (Ofcom), იტალიის (AGCOM), ლიეტუვის (RTK) და სხვა ქვეყნების მარეგულირებლისთვის.
შეგახსენებთ, რომ „მაუწყებლობის შესახებ“ საქართველოს კანონში შეტანილი ცვლილებები ასოცირების შესახებ შეთანხმების ვალდებულებას წარმოადგენს, რაც აუდიოვიზუალური მედიამომსახურებების შესახებ 2010/13/EU დირექტივასთან ჰარმონიზაციას ემსახურება და საქართველოს ევროკავშირში ინტეგრაციის პროცესის შემადგენელი ნაწილია.
ინფორმაციას კომუნიკაციების კომისია საზოგადოებასთან ურთიერთიერთობის სამსახური ავრცელებს