კეკელიძის ქუჩაზე გამოსახლების პროცესში მომხდარი ინციდენტის დროს დააკავეს თსუ-ს ლექტორი აკაკი ჩიქობავა და ილიას უნივერსიტეტის დოქტორანტი, აქტივისტი გიორგი ხასაია, რომლებთან მიმართებაში სისხლის სამართლის გამოძიება მიმდინარეობს. აღნიშნულს მწვავე ფორმებით აპროტესტებენ სტუდენტები, რომლებმაც დაიკავეს თბილისის სახელმწიფო უნივერსიტეტის კანცელარია და წამოაყენეს მოთხოვნები, რომ გათავისუფლებულ იქნენ დაკავებული პირები და შეწყდეს გამოსახლებები. მომხდარ ფაქტს სპეციალური განცხადებით გამოეხმაურა უნივერსიტეტის ადმინისტრაცია:
“ივანე ჯავახიშვილის სახელობის თბილისის სახელმწიფო უნივერსიტეტი სტუდენტებისთვის, პროფესორ-მასწავლებლებისა და ადმინისტრაციის თანამშრომლებისთვის უზრუნველყოფს უსაფრთხო სასწავლო და სამუშაო გარემოს, პატივს სცემს მათ უფლებებსა და თავისუფლებას.
თბილისის სახელმწიფო უნივერსიტეტი დაინტერესებულია თსუ-ის მოწვეული ლექტორის, აკაკი ჩიქობავას, საკითხით. აკაკი ჩიქობავას ადვოკატისა და ოჯახის მომართვის შემთხვევაში უნივერსიტეტის პროფესორები მზად არიან თხოვნით მიმართონ შესაბამის უწყებებს და თავდებში დაუდგნენ მას.
ამასთან, უნივერსიტეტისთვის მიუღებელია ულტიმატუმის ენით საუბარი, დესტრუქციული ქმედებები, რომლებიც ზიანს აყენებს უნივერსიტეტის ავტორიტეტს, ხელს უშლის სასწავლო პროცესს და, ზოგადად, საუნივერსიტეტო ცხოვრებას.
მიგვაჩნია, რომ დიალოგი მხოლოდ იმ შემთხვევაშია შესაძლებელი, თუ ის საუნივერსიტეტო ეთიკის ფარგლებში დაბრუნდება“, – ნათქვამია გავრცელებულ განცხადებაში.
