“შეცდომები დიპლომატიაში ტრაგიკული შედეგებით მთავრდება” – შალვა ნათელაშვილი

,,ლეიბორისტული” პარტიის თავმჯდომარე, შალვა ნათელაშვილი საგანგებო ბრიფინგზე გაკეთებული განცხადებით საქართველოს პრეზიდენტს მიმართავს და მოითხოვს, ბელარუსის ახლადდანიშნული ელჩისგან რწმუნებათა სიგელები მიიღოს და ასევე დაუყოვნებლივ დაინიშნოს საქართველოს ელჩი ბელარუსის რესპუბლიკაში, რათა არ მოხდეს დიპლომატიურ ურთიერთობაში შეცდომების დაშვება:

,,მოგეხსენებათ, 2008 წლის შემდეგ ბელარუსის მთავრობა და პრეზიდენტი ძალიან დიდ ზეწოლას უძლებს მოსკოვიდან, რომელიც მათ სთხოვს, აღიარონ აფხაზეთის და ცხინვალის რეგიონის დამოუკიდებლობა და ჩვენ ამას ვაფასებთ.

ახლა ვიგებთ საოცარ ამბავს – საქართველოს პრეზიდენტი რწმუნებათა სიგელებს ბელარუსის ახლადდანიშნული ელჩისგან არ იღებს, ხოლო საქართველოს მთავრობა მინსკში არ ნიშნავს საქართველოს ახალ ელჩს, რომელიც იქ უნდა იჯდეს და აკონტროლებდეს ვითარებას სრულიად.

ერთადერთი დასკვნა აქედან შეიძლება გავაკეთოთ, რომ ყველაფერი დაგეგმილია მოსკოვში, რომელსაც სურს გააღიზიანოს ბელარუსის მთავრობა და ხელმძღვანელობა, წაიყვანოს ისინი აფხაზეთის და ცხინვალის აღიარების პლატფორმაზე. სხვა დასკვნის გაკეთება აქედან შეუძლებელია.

მე ვაფრთხილებ პირადად ბიძინა ივანიშვილს და საქართველოს ე.წ. პრეზიდენტს – სასწრაფოდ დანიშნეთ საქართველოს ელჩი ბელარუსის რესპუბლიკაში და მიიღეთ რწმუნებათა სიგელები ბელარუსის ახლადდანიშნული ელჩისგან.

ერთხელ და სამუდამოდ გაიგონ, ვისაც ეხება – შეცდომები დიპლომატიაში ტრაგიკული შედეგებით მთავრდება“, – განაცხადა შალვა ნათელაშვილმა.

ავტორი
ნინი ხიჯაკაძე