“მარტო ჩვენ კი არა, მთელი მსოფლიო უკრაინას უყურებს” – გიული ალასანია

არასამთავრობო ორგანიზაციებმა უკრაინიდან საქართველოში საახალწლო ღონისძიებაზე 30-მდე ბავშვი ჩამოიყვანეს. აღნიშნულ ინიციატივასთან დაკავშირებით კომენტარი გააკეთა საქართველოს მე-3 პრეზიდენტის დედამ, გიული ალასანიამ:

,,მარტო ჩვენ კი არა, მთელი მსოფლიო უკრაინას უყურებს და მთელ მსოფლიოს უკრაინის იმედი აქვს.

ეს ძალიან კარგი ინიციატივაა. ჩემი შვილის სურვილი იყო. არასამთავრობო ორგანიზაციებმა ითავეს – 30 ბავშვია ჩამოყვანილი ირპენიდან.

ამ ბავშვებს ძალიან მძიმე ცხოვრება აქვთ იქ და ჩავთვალეთ, რომ სწორედ ამ ბავშვებისთვის ეს განსაკუთრებით მნიშვნელოვანია, რაღაცა ჰაერის ჩასუნთქვა.

ჩვენი მასპინძლები მაქსიმალურად ცდილობენ, რომ საქართველო აჩვენონ და ამ ბავშვებს საახალწლო ზეიმი მოუწყონ“, – განაცხადა გიული ალასანიამ.

ავტორი
ნინი ხიჯაკაძე