გორის მუნიციპალიტეტში, სოფელ კირბალში, საოკუპაციო ხაზთან ახლოს რუსი სამხედროების მიერ მოკლული საქართველოს მოქალაქის, თამაზ გინტურის ძმა, ნიკოლოზ გინტური ჟურნალისტებთან კომენტარს აკეთებს ექსპერტიზის შედეგების მოლოდინთან დაკავშირებით:
,,დავათვალიერე ჩემი ძმის მანქანა, ვნახე. იძახდნენ 3-4 ტყვია აქვსო ნასროლი, მაგრამ 35 ტყვიაზე მეტი აქვს ნასროლი, რაც მე დავთვალე. 2 ნატყვიარი აქვს სავარძელზე, სადაც იჯდა, დანარჩენი – მანქანას ეტყობა გარშემო. საბურავებზე ვერ დავთვალე რამდენია. საბურავებზე არ მინახია…
გამოძიება არ დამთავრებულაო, ექსპერტიზა არ ჩატარებულაო და ველოდებით ექსპერტიზის ჩატარებას.
მე როგორც ვფიქრობ, ჩვენი მთავრობა ვერაფერს ვერ გააკეთებს და არც გააკეთებს.
ველოდები ცოტახანი ექსპერტიზის დასკვნას. მოვითხოვ, ჩემი ძმის მკვლელების დასჯას! საქართველოს გადმოსცენ, საქართველომ გაასამართლოს! თუ არადა, მერე სტრასბურგში გავასაჩივრებთ და გავგზავნით საბუთებს“, – განაცხადა ნიკოლოზ გინტურმა.
ავტორი
ნინი ხიჯაკაძე
