“თვე არ გავა, რომ საქართველოს მოქალაქე არ გაიტაცონ ან არ მოკლან” – ხატია დეკანოიძე

საპარლამენტო პოლიტიკური ჯგუფის ,,ევროოპტიმისტების” წევრი, ხატია დეკანოიძე ჟურნალისტებთან მწვავე განცხადებას აკეთებს საქართველოს ოკუპირებულ თუ მიმდებარე ტერიტორიებზე მოქალაქეების გატაცებისა თუ მკვლელობის ფაქტებთან დაკავშირებით:

,,თვე არ გავა, რომ საქართველოს მოქალაქე არ გაიტაცონ, ან ჩვენი მოქალაქე არ მოკლან, რისი ძალიან მძიმე მაგალითებიც ჩვენ მთელი ამ პერიოდის განმავლობაში გვაქვს.

მიუხედავად ამისა, საქართველოს ხელისუფლებას, პრაქტიკულად, არ გადაუდგამს არცერთი ისეთი ნაბიჯი, რომელიც ,,ოთხოზორია-ტატუნაშვილის სიის” აღსრულების რაიმე მექანიზმი იქნებოდა.

ჩვენ ამ საკითხს ძალიან სერიოზულად უნდა მივუდგეთ. კიდევ ერთი რეზოლუცია უნდა მივიღოთ. რეალურად, ჩვენ უნდა მოვთხოვოთ საქართველოს ხელისუფლებას, რომ კიდევ უფრო მძიმე, სერიოზული და ძალიან მნიშვნელოვანი ნაბიჯები გაატაროს ამ მიმართულებით“, – განაცხადა ხატია დეკანოიძემ.

გავრცელებული ინფორმაციით, საქართველოს ოკუპირებულ ტერიტორიაზე, გალში, ძალოვანებმა საქართველოს მოქალაქე, 43 წლის თემურ კარბაია ქუჩაში სასიკვდილოდ სცემეს.