ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია youtube-ის საკუთარ პლატფორმაზე ვრცელ ინტერვიუში საუბრობს 2024 საპარლამენტო არჩვენებთან დაკავშირებით:
,,მე მკაფიოდ ვიცი, რისთვის ვიბრძვი. მე არ მაქვს მიზნად რაიმე თანამდებობა. ჩემი მიზანი არის მარტივი, რომ ერთხელ და სამუდამოდ, საქართველოში შეიქმნას ისეთი პოლიტიკური სისტემა, რომელიც შეუძლებელს ხდის ნებისმიერი ფორმის პარტიული ან ინდივიდუალური ლიდერობისთვის ძალაუფლების სრულ უზურპაციას და ქვეყანაში შევქმნათ მექანიზმი, რომელიც გარდაუვალს ქმნის ძალაუფლებისა და ხელისუფლების ცვალებადობას არჩევნებით.
2024 წელს ქვეყანას, მთელი ისტორიის მანძილზე, პირველად ექნება სრულად პროპორციული საარჩევნო სისტემა, რაც არის შესაძლებლობა – ეს ერთი. მეორე – კონსტიტუციით საქართველო არის საპარლამენტო დემოკრატია, ეს არის პირველი შემთხვევა, როდესაც საპარლამენტო რესპუბლიკა და სრულად პროპორციული საარჩევნო სისტემა ერთმანეთს ემთხვევა. ნებისმიერი, მეტ-ნაკლებად ნორმალური არჩევნების პირობებში, საპარლამენტო კომპოზიცია იქნება ისეთი, რომ ქართველი პოლიტიკოსები იძულებულები იქნებიან კომპრომისი ისწავლონ. სხვანაირად, უბრალოდ ქვეყანას დაანგრევენ ან უნდა მოახდინონ საპრეზიდენტო სისტემისთვის მისაღები ძალაუფლების უზურპაცია საპარლამენტო სისტემაში, რაც იქნება აბსოლუტურად წარმოუდგენელი და თვალხილული საქართველოს მოქალაქეებისთვის, რომლებიც შეცდომას აღარ დაუშვებენ, დარწმუნებული ვარ, შემდეგ არჩევნებში თავის წინა შეცდომას გამოასწორებენ.
კიდევ ერთი რამ, რაც პირველად ხდება ჩვენს პოლიტიკურ ცხოვრებაში, ეს არის პირველი შემთხვევა ბოლო 30 წლის განმავლობაში, როდესაც ხელისუფლება მიდის მე-4 ვადით არჩევნებზე – ერთპიროვნული სრულად გამარჯვების, მთავრობის სრული კონტროლის ამბიციით.
და ბოლოს, ეს არის პირველი შემთხვევა, როდესაც ბოლო 30 წლის განმავლობაში ჩვენ გვყავს ხელისუფლება, რომელიც კითხვის ნიშნის ქვეშ აყენებს ჩვენი ხალხის ბოლო 30 წლის კონსესუსს, ქვეყნის კულტურულ და პოლიტიკურ არჩევანთან დაკავშირებით, ევროპის მიმართულებით“, – განაცხადა გიორგი გახარიამ.
ავტორი
ნინი ხიჯაკაძე
