არც ხელისუფლებამ იცოდა, რომ დღეს გაფრინდაშვილს გაათავისუფლებდნენ, არც ოჯახმა, ვიცოდით მე და დავით თარხან-მოურავმა – ირმა ინაშვილი

153

საოკუპაციო რეჟიმის მიერ დატყვევებულ ექიმ ვაჟა გაფრინდაშვილის გათავისუფლებასთან დაკავშირებით ინფორმაციას ავრცელებს საქართველოს პარლამენტის ვიცე-სპიკერი, “პატრიოტთა ალიანსის” გენერალური მდივანი. ირმა ინაშვილის განცხადებით ვაჟა გაფრინდაშვილის განთავისუფლება არის მათი პარტიის და უშუალოდ ლიდერის დავით თარხან მოურავის დამსახურება (იხ. ირმა ინაშვილის პირდაპირი ჩართვა, პუბლიკაციის ბოლოში) და რომ დატყვევებული ექიმის გათავისუფლების შესახებ იცოდნენ მხოლოდ პარტიის ლიდერებმა და სხვამ არავინ:

ვაჟა გაფრინდაშვილი თავისუფალია. ახლა ესაა მთავარი. ის, რომ ბატონი ვაჟა სწორედ დღეს დილით უნდა გაეთავისუფლებინათ, ვიცოდით ჩვენ და ამიტომაც დილის 10 საათიდან გამშვებ პუნქტთან ვიდექი მარტო. მკაფიოდ ვამბობ და სიმართლეს ვამბობ: არც ხელისუფლებამ იცოდა, რომ დღეს გაფრინდაშვილს გაათავისუფლებდნენ, არც ოჯახმა. ვიცოდით ჩვენ: მე
და დავით თარხან-მოურავმა.

ერგნეთში პოლიციის თანამშრომლებს ვუთხარი, რომ ჩემს ახლობელს ველოდი და როცა მანქანებს დაინახავდნენ, შეეტყობინებინათ ჩემთვის. პუნქტთან ჩემი მისვლის შემდეგ, გააქტიურდა ხელისუფლება და მისი სტრუქტურები და მანქანა მანქანაზე მოდიოდა. ზუსტად თერთმეტიდან თორმეტის ოც წუთამდე ჩვენი არხებით მქონდა ინფორმაცია, რომ ვაჟა გაფრინდაშვილი თავისუფალია და ველოდი მასთან შეხვედრას, თუმცა უშიშროების სამსახურმა ბატონი ვაჟა ისე გაიყვანა ერგნეთიდან, პრაქტიკულად გააქრო, რომ გამარჯობის თქმაც ვერ მოვასწარი. სამაგიეროდ, გორის სამხარეო პოლიციაში მასთან ხელისუფლების წარმომადგენლებმა მყისიერად მოუხმეს დავით ბაქრაძეს, რომელმაც, ეტყობა, გაფრინდაშვილისთვის ბევრი “იშრომა” და ინტერვიუებიც უხვად არიგა.

არვიცი, ვინ რას იწერს ან არ იწერს ან მისაწერ-მოსაწერი რაა (კაცი ახალ წელს სახლში შეხვდება), მე ვიცი კონკრეტულად დღევანდელი დღისთვის რა გავაკეთეთ ჩვენ და ცუდია, როცა ამისი აღიარება კი არა, აღნიშვნაც არ ხდება. და მეტიც, დავით ბაქრაძეს პოლიციაში უხმობენ, რომ გაფრინდაშვილის გათავისუფლებას მიესალმოს და მე პოლიციის კარს მიკეტავენ, რისი უფლებაც არა აქვთ. არა უშავს, ღმერთი მაღალია.

ყველას გილოცავთ ამ კარგ დღეს. ❤️ დანარჩენზე სხვა დროს ვისაუბრებ. მთელი ღამე მეღვიძა“, – წერს ფეისბუკის პირად გვერდზე ირმა ინაშვილი.

ირმა ინაშვილის პირდაპირი ჩართვა ერგნეთის გამშვები პუნქტიდან.

კომენტარები