“ხელისუფლება 2024 წლის არჩევნებზე, ინჯიას ხელით აბრუნებს, ადვილად გასაყალბებელი დოკუმენტით ხმის მიცემის შესაძლებლობას, რასაც ოცნება მხარს დაუჭერს” – ამის შესახებ ცესკოსა და “სტრატეგია აღმაშენებლის” პოლიტიკური საბჭოს წევრმა ანა კობახიძემ “ევროპელი სოციალისტების” მიერ საარჩევნო კოდექსში დაინიცირებულ ცვლილებებთან დაკავშირებით განაცხადა
მისივე თქმით, აღნიშნული ცვლილებები ინჯიას ხელით ხელისუფლების მიერაა ინიცირებული და ეს ყოველივე ამცირებს შანსს, 12 რეკომენდაციიდან ერთ-ერთი, საარჩევნო კოდექსის რეფორმა შესრულებულად ჩაითვალოს:
“საქართველოს პარლამენტში ინიცირებულია ცვლილებების პაკეტი საარჩევნო კოდექსში და ინიციატორია ,,ევროპელი სოციალისტები”. ცვლილებების თანახმად, ამომრჩეველს ისევ ექნება შესაძლებლობა ხმა მისცეს ე.წ ,,ლამინირებული” პირადობის მოწმობით.
2022 წლის ცვლილებების მიხედვით, ეს ნაწილი ყველა მხარის მიერ მიიჩნეოდა გაუმჯობესებულად, როგორც ოპოზიციისთვის, ასევე ვენეციის კომისიისთვის. ეს იყო წინ გადადგმული ნაბიჯი, მაგრამ ხელისუფლება 2024 წლის არჩევნებზე ინჯიას ხელით აბრუნებს ადვილად გასაყალბებელი დოკუმენით ხმის მიცემის შესაძლებლობას. ვითომ ,,ოპოზიციის” მიერ ინიცირებულ პროექტს, რა თქმა უნდა, ,,ოცნება” მხარს დაუჭერს, რადგან ეს არის მათი ინიციატივა, ინჯიას ხელით შესრულებული.
ასეთი ცვლილებები აზრს უკარგავს ტექნოლოგიების შემოტანის შემდეგ მანიპულაციების შემცირების შასაძლებლობას და კიდევ უფრო ამცირებს შანსს 12 პუნქტიდან ერთ-ერთი, რომელიც საარჩევნო ცვლილებებს ეხებოდა, ჩაითვალოს შესრულებულად”, – აცხადებს ანა კობახიძე.