საკუთარი სახლის სიახლოვეს თავდასხმა განხორციელდა ცოტნე გამსახურდიაზე. გავრცელებული ინფორმაციით თავდასხმა რამდენიმე ადამიანმა განახორციელა, რა დროსაც ცივი იარაღით მძიმედ დაჭრეს საქართველოს პირველი პრეზიდენტის, ზვიად გამსახურდიას ვაჟი.
დაჭრილი გადაყვანილია სიმონ ხეჩინაშვილის სახელობის საუნივერსიტეტო კლინიკაში (მე-9 საავადმყოფო).
საავადმყოფოს ექიმის განცხადებით:
“დაზიანებულია გულმკერდის მარცხენა ნახევარი. ამ მიდამოში აღინიშნება ნაჩხვლეტ-ნაკვეთი ჭრილობები, გულმკერდის ღრუში შემავალი ჭრილობები, მარცხენა ფილტვის ზედა წილის დაზიანებით და ე.წ. ჰემოპნევმოთორაქსი ანუ პლევრის ღრუში სისხლის და ჰაერის არსებობით. გარდა ამისა აღინიშნება ზურგის მიდამოს მარცხენა ბეჭის მიდამოში ნაკვეთ-ნაჩხვლეტი ჭრილობა და თავის მიდამოში, თხემის მიდამოში 4 ჭრილობა – ნაკვეთი და დაჟეჟილი ჭრილობები.
მე და ჩემმა კოლეგებმა თორაკოტომია ანუ გავხსენით გულმკერდის ღრუ, ჩავატარეთ შესაბამისი ოპერაცია. სისხლდენა გაჩერებულია. ახლა პაციენტი ჩამოყვანილია კომპიუტერული პომოგრაფიის კაბინეტში, რადიოლოგიურ დეპარტამენტში, სადაც ჩაუტარდება თავის ქალის კომპიუტერული ტომოგრაფია დაზიანების ხარისხის სანახავად და ნეიროქირურგი გადაწყვეტს მკურნალობის ტაქტიკას, საჭირო იქნება კიდევ დამატებით ნეიროქირურგიული ოპერაციის გაკეთება თუ არა.
მდგომარეობა სერიოზულად მძიმეა“.