რონდელის ფონდის მკვლევარი, აღმოსავლეთმცოდნე, ისტორიის მეცნიერებათა დოქტორი, ზურაბ ბატიაშვილი აგრძელებს კონკრეტული ინფორმაციების გამოქვეყნებას ახლო აღმოსავლეთში მიმდინარე მძიმე სამხედრო დაპირისპირებასთან დაკავშირებით:
“რა ხდება ისრაელ-პალესტინის კონფლიქტში ამ მომენტისთვის?
– ისრაელმა დაასრულა კონტროლის აღდგენა იმ დასახლებულ პუქტებზე ღაზას სექტორის გარშემო, სადაც შეჭრილები იყვნენ “ჰამასის” მებრძოლები;
– ამ ოპერაციის დასრულების შემდეგ ზემოხსენებულ ტერიტორიებზე იპოვეს 1 500 “ჰამასელის” გვამი (ისინი გაანადგურა ისრაელმა ოპერაციის მიმდინარეობისას);
– ჯერ არ დაწყებულა სახმელეთო ოპერაცია ღაზას სექტორში. თუმცა, მზადება მთელი ძალით მიმდინარეობს;
– ამ მზადების ნაწილია ღაზას სექტორის შეუჩერებელი საჰაერო დაბომბვები, რათა სახმელეთო ოპერაციას ნაკლები წინააღმდეგობა შეხვდეს ადგილზე;
– მხოლოდ ამ ღამეს 200 დაბომბვა განახორციელა ისრაელმა ღაზას სექტორში (ფოტოზე სწორედ ერთ-ერთი ასეთი დაბომბვის შედეგი ჩანს);
– ისრაელმა დაიწყო ღაზას სექტორის ბლოკადა (გადაუკეტა წყლის, სურსათის და ელექტროენერგიის მიწოდება);
– ისრაელი მოუწოდებს ღაზას მაცხოვრებლებს, დატოვონ ტერიტორია და ეგვიპტეში გადავიდნენ. მაგრამ კაიროს არ სურს ლტოლვილის მიღება, რომლებსაც შეიძლება “ჰამასელები” შეერიონ და უსაფრთხოების პრობლემები შეუქმნან ეგვიპტეს;
– ღაზას სექტორში “ჰამასის” ხელში კვლავ რჩებიან მძევლები, რომელთა შორის ისრაელელების გარდა დასავლეთის ქვეყნების მოქალაქეებიც არიან;
– ისრაელმა გადაწყვიტა კიდევ უფრო გაზარდოს (60 ათასით) რეზერვში გამოძახებულთა რაოდენობა, რომელიც საერთო ჯამში 360 000 გახდება;
– ისრაელს ეს რაოდენობა სჭირდება იმისთვის, რომ საჭიროების შემთხვევაში გაუმკლავდეს სხვა ადგილებიდან (პირველ რიგში ჩრდილოეთიდან “ჰესბოლას”) შესაძლო შეტევებს;
– ჩრდილოეთში კი უკვე იყო შეტაკებები. თუმცა, მას ჯერჯერობით მასიური სახე არ ჰქონია;
– ისრაელში უკვე ჩაფრინდა აშშ-ს სამხედრო-სატვირთო თვითმფრინავები, რომლებსაც ჩააქვთ სამხედრო დახმარება;
– იზრდება მსხვერპლი – ისრაელის მხარეს დაღუპულია 900, დაჭრილია 2 400 ადამიანი; პალესტინის მხარეს – 704 (გარდა ზემოხსენებული 1 500 მებრძოლისა) და დაჭრილია 3 900 ადამიანი;
განახლებულ ინფორმაციას შემდგომშიც შემოგთავაზებთ“, – წერს ფეისბუქის პირად გვერდზე ზურაბ ბატიაშვილი.