საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ევროკომისიის ვიცე-პრეზიდენტმა, ჯოზეფ ბორელმა თბილისში არასამთავრობო ორგანიზაციების წარმომადგენლებთან შეხვედრა გამართა. შეხვედრის შემდეგ, საქართველოსთვის ევროკავშირის კანდიდატის სტატუსის მინიჭების საკითხზე, ჟურნალისტებთან კომენტარი გააკეთა არასამთავრობო ორგანიზაცია ,,სამოქალაქო იდეის” თავმჯდომარემ, თინა ხიდაშელმა:
,,ჩემი აზრით, ევროკომისიას გადაწყვეტილება მიღებული აქვს უკვე რამდენიმე თვეა, ვინაიდან ყველა შეხვედრაზე, რომელსაც ვმართავთ და მარტო დღეს არა, იგივე – ბრიუსელში, ჩვენ მოვდივართ ოპტიმისტური გზავნილით, რომ ჩვენ კანდიდატის სტატუსს მივიღებთ იმ პირობით, თუ საქართველოს ხელისუფლებამ აქედან და წლის ბოლომდე მორიგი ,,რუსული კანონის” მაგვარი სურპრიზი არ შესთავაზა ქვეყანას.
სხვა შემთხვევაში, მე ვფიქრობ, რომ ევროკომისიას გადაწყვეტილება მიღებული აქვს. აქ საუბარი იმაზე არ არის, ჩემი აზრით, უკვე სტატუსს მოგვცემენ თუ არა, არამედ იმაზე – პირობები რა უნდა იყოს“, – განაცხადა თინა ხიდაშელმა.
ავტორი
ნინი ხიჯაკაძე
