საქართველოში ამერიკის შეერთებული შტატების ელჩის, კელი დეგნანის მიერ, გამოსამშვიდობებელ პრესკონფერენციაზე გაკეთებულ განცხადებებზე, მწვავე შეფასებას აკეთებს პარლამენტის პირველი ვიცე-სპიკერი, გიორგი ვოლსკი და აქვე აცხადებს, რომ, რუსეთის საფრთხეებიდან გამომდინარე, საქართველოს პრაგმატული პოლიტიკა აქვს არჩეული:
,,ევროპის, დასავლეთის სტრატეგიული მიმართულებისაგან გადახვევას ეს არ ნიშნავს. იმდენად არ ნიშნავს, რამდენადაც სახელმწიფომ თავისი სტრატეგია ჩამოაყალიბა და ოპტიმალური ვარიანტი შეარჩია იმისათვის, რათა გადარჩეს ფიზიკურად და თავისი ხალხი სამშვიდობოს გაიყვანოს.
თუკი რაიმე მოსაზრებები ჩვენ საწინააღმდეგო გაგვაჩნია, თუნდაც, ამერიკის ელჩის მოსაზრებებზე, რომელსაც მიაჩნია, რომ მაგალითად, ელექტრონული არჩევნები შეიძლება გაყალბდეს, ან მოუწოდებს საზოგადოებას, რომ გამოვიდნენ და რევოლუციურ პროცესში ჩაერთონ. ამას თუ რამით უპასუხებ, ეს ნორმალურია ამერიკელებისთვის”, – განაცხადა გიორგი ვოლსკიმ.
ამასთან, მმართველი პარტიის ერთ-ერთმა ლიდერმა, ოპოზიციას კონკრეტული ფაქტი შეახსენებს:
,,უსამართლობის პიკია იმიტომ, რომ ელექტრონული არჩევნები, მათ შორის, პროპორციული არჩევნები, ეს სწორედ ის თემაა, რომელსაც ოპოზიცია და საზოგადოების დიდი ნაწილი ითხოვდა. დიდი ნაწილი, მაგრამ არა ყველა და არა უმრავლესობა.
მაგრამ, რახან ეს გაკეთდა, ეს ნაბიჯი გადაიდგა – ისეთი შთაბეჭდილება რჩება, რომ გაყალბების, ამ წინაპირობის, საფუძვლის ან მექანიზმის არარსებობა, გარკვეულ დისკომფორტს უქმნის ოპოზიციას, რომ აღარ ექნებათ დაბრალების საშუალება, თუკი არჩევნები იქნება ელექტრონული”, – განაცხადა გიორგი ვოლსკიმ.
ავტორი
ნინი ხიჯაკაძე
