სამედიცინო ცენტრ ,,ვივამედის” კლინიკური დირექტორი, ზურაბ ჩხაიძე ტვ ,,პირველის” ჟურნალისტთან კომენტარს აკეთებს საქართველოს მე-3 პრეზიდენტის ჯანმრთელობის მდგომარეობასთან დაკავშირებით. მისი განმარტებით, ამ ეტაპისთვის პაციენტის სასიცოცხლო მაჩვენებლები გაუმჯობესებულია, ხოლო ევროპარლამენტარ ანა ფოტიგას შეშფოთება მიხეილ სააკაშვილის დამძიმებულ მდგომარეობაზე, მისთვის გაურკვეველია:
,,მე შემიძლია გითხრათ, რომ ამ დროისთვის პაციენტის ჯანმრთელობის მდგომარეობა, შეიძლება ითქვას, რომ გაუმჯობესებულია. საყურადღებო რჩებოდა ლაბორატორიული კვლევის შედეგები, რომელიც ჩვენ განმეორებითი კვლევის შედეგადაც ვნახეთ და ყველა მაჩვენებელი არის გაუმჯობესებული.
რაც შეეხება პაციენტს – ის უფრო აქტიურია, ჩივილებსაც ნაკლებად წარმოადგენს. კვების რაციონის, რა თქმა უნდა, სრულად გათვალისწინება მაინც არ ხდება, მაგრამ არის კვების მხრივადაც – გაუმჯობესება. მე ვერ გეტყვით, რამ გამოიწვია შეშფოთება ამ ქალბატონის.
[ჟურნალისტის შეკითხვა]: – კონკრეტულად, რა მაჩვენებლებია გაუმჯობესებული?
საყურადღებო აქ რჩებოდა სისხლის მაჩვენებლები, შედარებით ნორმაზე უფრო დაბალი იყო მაჩვენებლები, ჩაუტარდა შესაბამისი მკურნალობა და შეიძლება ითქვას, რომ მაჩვენებლები აშკარად გამოსწორებულია. პაციენტი იღებს უფრო მეტი რაოდენობითაც ახლა უკვე საკვებს. თუმცა, არა იმ კალორაჟით და არა იმ რაოდენობით, რის რეკომენდაციასაც ჩვენ ვაძლევთ. ჩვენ იმედი გვაქვს, რომ ის კიდევ უფრო მეტად გაითვალისწინებს ამ ჩვენს რეკომენდაციებს.
[ჟურნალისტის შეკითხვა]: – ამ დროისათვის მიხეილ სააკაშვილის მდგომარეობა არ არის ისეთი, რომ დაექვემდებაროს ციხეში გადაყვანას?
ამ პერიოდისთვის, რა თქმა უნდა, მისი ჯანმრთელობის მდგომარეობა, მოცემულობები, ლაბორატორიული კვლევის შედეგები და ის პარამეტრები, რაც მას გააჩნია, შეესაბამება სრულად სტაციონარის პირობებში მკურნალობას“, – განაცხადა ზურაბ ჩხაიძემ.
ინფორმაციისთვის: საქართველოს მე-3 პრეზიდენტის, მიხეილ სააკაშვილის ჯანმრთელობის მდგომარეობაზე კრიტიკული შეფასება გააკეთა ევროპარლამენტარმა, ანა ფოტიგამ:
,,ძალიან ემოციური საუბარი გვქონდა პრეზიდენტ მიხეილ სააკაშვილის დედასთან, გიული ალასანიასთან. ბოლო ვიზიტი დამოუკიდებელი ექიმების მხოლოდ დადასტურებაა იმისა, თუ რა არის თვალნათელი ყველა ჩვენგანისთვის: მისი ჯანმრთელობის მდგომარეობა უარესდება. ძალიან სამწუხაროა ასეთი დასკვნის მოსმენა.
კიდევ ერთხელ მივმართავ: ძალიან ბევრი მიზეზი და გზაა, რომ შეიცვალოს ეს სიტუაცია, სანამ ძალიან გვიანი არაა, მათ შორისაა, ჰუმანიტარული საფუძვლები“, – წერს Twitter-ზე ანა ფოტიგა.
ავტორი
ნინი ხიჯაკაძე
