საქართველოს პრემიერ-მინისტრი, ირაკლი ღარიბაშვილი ჟურნალისტებთან კომენტარს აკეთებს 2008 წლის აგვისტოს ომზე და აცხადებს, რომ დღეს, სწორი და პრაგმატული პოლიტიკით უნდა მოხდეს საქართველოს ტერიტორიების დაბრუნება, რადგან მშვიდობაზე ძვირფასი არაფერია:
,,რატომ ვერ მოხდა, თავის დროზე, სათანადო პრევენცია ამ ომის?! რატომ ვერ გაკეთდა რისკების შეფასება?! – ამას მარტივად პატარა ბავშვი გათვლიდა, იმ შესაძლო ნაბიჯებს, რომელიც მოჰყვებოდა, ასე ვთქვათ, ამ პროვოკაციებს, რომელიც ომის დაწყებამდე რამდენიმე დღით ადრე ხდებოდა.
ჩვენ ეს არაერთხელ გვითქვამს, რომ ამ ომის თავიდან აცილება იყო შესაძლებელი. ვიცი რა ეს ინფორმაცია, რაც ხდებოდა და როგორ ვითარდებოდა მოვლენები.
მაშინ ჩვენ ვნახეთ ყველაზე სამარცხვინოდ მოქცეული ყოფილი მთავარსარდალი. გახსოვთ, ჰალსტუხის ღეჭვა, ვნახეთ გაქცეული, თვითმფრინავის ხმის გამო, წაქცეული, მიწაზე გართხმული. ძალიან დიდი სირცხვილი ჭამა, რომ იტყვიან და ნახა მთელმა საზოგადოებამ.
თუ ვინმემ გააკეთა რუსეთის საქმე, ეს არის სააკაშვილი. 9 აგვისტოს – მაშინ, როცა იბომბებოდა ჩვენი ქალაქები და ჩვენი გმირები ბრძოლის ველზე გმირულად იხოცებოდნენ, გახსოვთ, მაშინდელი უშიშროების საბჭოს სხდომის ჩანაწერი არსებობის ამის თაობაზე, თუ როგორ იქცეოდნენ ეს ადამიანები. საერთოდ, მათ არ ადარდებდათ, არ ანაღვლებდათ.
შეგიძლიათ, ასევე, გაეცნოთ იმდროინდელი პრეზიდენტის ბრძანებას, სადაც პირდაპირ უწერია – ,,8 აგვისტო”. 2012 წლამდე 8 აგვისტოს აღნიშნავდნენ ოფიციალურად ომის დაწყების თარიღს.
მეგობრებო, მშვიდობას ალტერნატივა არ აქვს. ჩვენ მშვიდობით, ჩვენი სწორი, ჭკვიანური, პრაგმატული პოლიტიკით უნდა დავიბრუნოთ ჩვენი ტერიტორიები“, – განაცხადა ირაკლი ღარიბაშვილმა.
ავტორი
ნინი ხიჯაკაძე
