გუშინ, 16 ოქტომბერს ტელეკომპანია “იბერიამ” ნაწილობლივ შეაჩერა მაუწყებლობა, ღამიდან კი არხმა გათიშა მაუწყებლობა და ეკრანზე გამოჩნდა წარწერა – “ხელისუფლებამ დახურა იბერია!!!“.
არხის საინფორმაციო სამსახურის უფროსის, ვახო ხუზმიაშვილის განმარტებით ტელეკომპანიას პრობლემები ხელისუფლების მიზეზით შეექმნა.
“ახლა რაც ხდება ტელეკომპანია “იბერიაში”, რომ ვერ გავა პოლიტიკური თოქ-შოუები, საინფორმაციო გამოშვება, ამაზე მთელი პასუხისმგებლობა ეკისრება ქვეყნის ხელისუფლებას. ქვეყნის ხელისუფლებამ მოახერხა, რომ არჩევნებამდე 12 დღით ადრე შეეჩერებინა ჩვენი მაუწყებლობა” – განაცხადა ვახო ხუზმიაშვილმა.
არხის ერთერთი დამფუძნებლის, საქართველოს პარლამენტის წევრის ნატო ჩხეიძის აზრით კი – ტელეკომპანიისთვის პრობლემების შექმნას და მის დახურვას ხელისუფლება 2 წლის განმავლობაში გეგმავდა:
“იბერიამ შეწყვიტა მაუწყებლობა, ხელისუფლებამ მიაღწია იმას, რასაც აგერ 2 წლის განმავლობაში აკეთებდა და ემზადებოდა, ამ დღისთვის და რასაც აგვისტოდან ხმამაღლა საუბრობდა “იბერიაც” და “ომეგა ჯგუფიც”. ძალიან სამწუხაროა ეს ვითარება, მაგრამ სამწუხაროა ეს, არა მხოლოდ იბერიისთვის, არამედ ქვეყნისთვის, რადგან, როდესაც ასეთი მეთოდებით ებრძვი მედიას, ეს არასდროს სასიკეთოდ არ აისახება, ხოლმე, ხელისუფლების მოქმედებაზე“.
სააგენტო “პარალელი” სოლიდარობას უცხადებს ტელეკომპანია “იბერია”-ს თანამშრომლებს და იმედს გამოთქვამს, რომ არხის მაუწყებლობა უმოკლეს ვადაში აღდგება და ჟურნალისტები, ტელეკომპანიის თანამშრომლები კვლავ გააგრძელებენ თავიანთ საქმიანობას.