“მოვუწოდებ საქართველოს მთავრობას, მოიწვიოს უსაფრთხოების საბჭო… საფრთხე რეალურია!” – გიორგი გახარია

რუსეთში განვითარებულ მოვლენებს, კერძოდ იქ მიმდინარე სამხედრო დაპირისპირებას ეხმაურება საქართველოს მთავრობის ყოფილი მეთაური, პარტია “საქართველოსთვის” თავმჯდომარე გიორგი გახარია. ოპოზიციონერ ლიდერს მიაჩნია, რომ საქართველოსთან მიმართებაშიც რეალურია საფრთხე და ხელისუფლებას რეაგირებისკენ მოუწოდებს:

“მოვუწოდებ საქართველოს მთავრობას, მოიწვიოს უსაფრთხოების საბჭო და დაიცვას ქვეყნის ინტერესები! არაპროგნოზირებადი ვითარების გათვალისწინებით და სახელმწიფოს უსაფრთხოების დაცვის მიზნით, დროებით ჩაიკეტოს საზღვრები რუსეთთან.

საფრთხე რეალურია! საქართველოს სახელმწიფო საზღვარი – ლარსის სასაზღვრო-გამშვები პუნქტი ყველაზე ახლო წერტილია გამწვავების ზონასთან.

მშვიდობის შენარჩუნებისთვის დროულად მოქმედებაა საჭირო“, – წერს ფეისბუქის საკუთარ გვერდზე გიორგი გახარია.