საქართველოს პარლამენტის შენობასთან ჭიათურელი მაღაროელების პროტესტი გრძელდება. მათი მთავარი მოთხოვნა სამუშაო პირობების გაუმჯობესება და შრომის შესაბამისი ანაზღაურების დანიშვნაა. ერთ-ერთი გაფიცული, რომელმაც პროტესტის ნიშნად თვალები ამოიკერა, ჟურნალისტებთან ემოციურ კომენტარს აკეთებს და საქართველოს პრემიერ-მინისტრს, ირაკლი ღარიბაშვილს მიმართავს:
,,კაციშვილი პატრონი არ გაგვაჩნია. მე პირადად გადავწყვიტე, რომ ჩამოვსულიყავი და მინდა ბატონ ღარიბაშვილს თხოვნით მივმართო, რომ მეც თქვენი მოქალაქე ვარ, მეც მიმიძღვის წვლილი ხელისუფლებაში თქვენს მოსვლაში. მინდა, რომ თვალებში ჩამხედოთ.
გაითვალისწინოთ, თითოეული მაღაროელი იმხელა პროდუქციას ვქმნით, იმხელა თანხები შედის ბიუჯეტში ჩვენ ზურგზე, ხელებზე – აგერ არის ფაქტი, 17 ნაკერი მადევს. ამ ნაშრომით ივსებოდა ბიუჯეტი. დღეს აღარავის ვჭირდები, თვალებაკერილი?! არა, მე კიდევ საჭირო ვარ და კიდევ საჭირო ვიქნები ყველასთვის!
აქ იმიტომ ჩამოვედი, რომ ბიჭები მეტად გავაძლიერო, გვერდში დავუდგე. ყველაფერს გავაკეთებ იმისთვის, რომ მე, გიორგი კუპატაძე სულ რომ არ გადავრჩე და დავიღუპო, ესენი იყვნენ კარგად“, – განაცხადა ერთ-ერთმა ჭიათურელმა მაღაროელმა.
ავტორი
ნინი ხიჯაკაძე
