ჭიათურაში გრძელდება მაღაროელების საპროტესტო აქციები. ისინი შრომის შესაბამის ანაზღაურებას და სამუშაო პირობების გაუმჯობესებას მოითხოვენ. პროსტეტი უკვე 12 დღეა გრძელდება. პირობებთან დაკავშირებით მოლაპარაკებები კომპანია ,,ჯორჯიან მანგანეზთან“ მიმდინარეობს.
პროტესტის მონაწილეები აღნიშნავენ, რომ მუშაობას არ გააგრძელებენ მანამ, სანამ მაღაროელების მოთხოვნები არ დაკმაყოფილდება.
აქციის ერთ-ერთმა მონაწილემ პროტესტის მწვავე ფორმას მიმართა და პირი ამოიკერა.
,,აი, ეს შედეგი გამოიღო მოლაპარაკებებმა. აქციის მონაწილემ პირი ამოიკერა” – წერია ერთ-ერთი მაღაროელის ფეისბუქ გვერდზე.
,,ჩვენ უკან დასახევი გზა აღარ გვაქვს. ნუ ცდილობთ 100%-იან მოგებაზე გასვლას. იკმარეთ 50%. დანარჩენი დაუტოვეთ ხალხს, რაც ეკუთვნის“, – აცხადებს აქციის ერთ-ერთი მონაწილე.
კომპანია ,,ჯორჯიან მანგანეზი/Georgian manganese” სოციალურ ქსელში განცხადებას ავრცელებს, სადაც განმარტებებს მაღაროელებთან მიმდინარე მოლაპარაკებების შესახებ:
,,ჯორჯიან მანგანეზის მენეჯმენტსა და იმ თანამშრომლებს შორის, რომლებიც შეცვლილ სამუშაო პირობებს არ თანხმებიან, აქტიური მოლაპარაკებები გრძელდება.
კომპანია ყველა დასაქმებულს მუშაობის განახლებას და ხელფასის 100%-ით გადახდას სთავაზობს, ბონუსები და ბენეფიტები კი წარმოების განახლების შემდეგ, ეკონომიკური ეფექტიანობის მიხედვით განისაზღვრება.
იმ თანამშრომლებს, რომლებიც მუშაობაზე უარს იტყვიან და გაფიცვას განაგრძობენ, კომპანია მედიაციის დასრულებამდე სპეციალურ სამუშაო რეჟიმს 1-ელ აგვისტომდე გაუხანგრძლივებს და ხელფასის 60%-ს გადაუხდის.
ხელფასის მატება, კომპანიის წინადადებით, ხუთი პროცენტით განისაზღვრება” – ნათქვამია ,,ჯორჯიან მანგანეზის’’ განცხადებაში.
მაღაროელების მთავარი მოთხოვნები ასეთია:
1. 40%-იანი ხელფასის მატება;
2. 2023 წლის 1 თებერვლამდე არსებული გრაფიკის/გეგმის დაბრუნება;
3. ყველა ბანკში სესხის პროცენტის დარიცხვის შეჩერება და გადახდის გადავადება, აქამდე დარიცხულის გასტუმრება;
4. დაზღვევის შეცვლა და პირობების გაუმჯობესება.
სულ 12 პუნქტისგან შედგება მოთხოვნები.
ავტორი
ნინი ხიჯაკაძე
