“ის ცვლილებები და შემოთავაზებები, რომლებიც წარმოადგინა “ქართულმა ოცნებამ”, არ ითვალისწინებს რომ სასამართლო სისტემა სრულად დამოუკიდებელი გახდება ან იუსტიციის უმაღლეს საბჭოში ვითარება შეიცვლება” – ნაზი ჯანეზაშვილი

,,ღია საზოგადოების ფონდის” ლიდერობით, 8 ორგანიზაციამ მოამზადა შეფასების დოკუმენტი – სტატუსმეტრი, სადაც საუბარია, თუ როგორ მიდის საქართველოში ევროკომისიის 12 რეკომენდაციის შესრულება. მართლმსაჯულების რეფორმასთან დაკავშირებით კომენტარი გააკეთა ორგანიზაცია ,,სასამართლოს გუშაგის” დამფუძნებელმა, ნაზი ჯანეზაშვილმა:

,,სასამართლო რეფორმის თვალსაზრისით, მნიშნელოვანი რეკომენდაცია 2 ძირითად საკითხს ეხება. ეს არის – იუსტიციის უმაღლესი საბჭოს რეფორმა და სამართლო სისტემის დამოუკიდებლობა.

სამწუხაროდ, ის ცვლილებები და შემოთავაზებები, თუნდაც, სხვადასხვა სტრატეგიის სახით, რომლებიც წარმოადგინა ,,ქართულმა ოცნებამ“, არ ითვალისწინებს იმას, რომ სასამართლო სისტემა სრულად დამოუკიდებელი გახდება ან იუსტიციის უმაღლეს საბჭოში ვითარება შეიცვლება და შესაბამის რეფორმას განახორციელებენ.

ეს არის ორი საკვანძო საკითხი. თუმცა, ის, რაც ამჟამად კანონპროექტის სახით საქართველოს პარლამენტში იხილება, რომელზეც გუშინ იყო მსჯელობა, გარკვეულწილად ვენეციის კომისიის დასკვნებს ითვალისწინებს, მაგრამ არ არის ისეთი სახით წარმოდგენილი და სრულყოფილი დოკუმენტი, რომელიც შეძლებს გაითვალისწინოს ერთი მხრივ, ვენეციის კომისიის შეთავაზებები სხვადასხვა ცვლილებების სახით, მეორე მხრივ – საქართველოში არსებული გამოწვევები სასამართლოს დამოუკიდებლობისა და ანგარიშვალდებულების ნაწილში.

განსაკუთრებით საუბარი არის იუსტიციის უმაღლეს საბჭოზე, რადგან მათი პროექტი, რომელზეც იყო მსჯელობა, საერთოდ არ ითვალისიწინებს იუსტიციის უმაღლესი საბჭოს რეფორმას. მიუხედავად იმისა, რომ 12 პუნქტიან გეგმაში ერთ-ერთი პირობაა“, – განაცხადა ნაზი ჯანეზაშვილმა.

ავტორი
ნინი ხიჯაკაძე