ევროპარლამენტარ ვიოლა ფონ კრამონის გზავნილებზე კრიტიკულ შეფასებას აკეთებს პარლამენტის ფრაქცია ,,ქართული ოცნების“ თავმჯდომარე, მმართველი პარტიის აღმასრულებელი მდივანი, მამუკა მდინარაძე:
,,ქართველი ხალხი ეს ქვეყანაა! ჩვენ, ყველა ერთად ვიმსახურებთ კანდიდატის სტატუსს. ეს დადასტურდა კრიტერიუმებით, რომელიც თავად ევროკავშირმა გამოაქვეყნა. დღევანდელი მოცემულობით საქართველო, სხვაზე მეტადაც კი, იმსახურებს კანდიდატის სტატუსს.
ახლა როგორც უნდათ დაატრიალონ. ქართველი ხალხია, საქართველოა და ამ ქართველ ხალხს და ჩვენს ქვეყანას დღეს წარმოადგენს საქართველოს ხელისუფლება. ამეების გამიჯვნა რუსული მეთოდებით არის ძალიან დამაზიანებელი, მათ შორის, ქალბატონი ვიოლასთვის და მისი პარტნიორებისათვის საქართველოში“, – განაცხადა მამუკა მდინარაძემ.
ინფორმაციისთვის: ევროპარლამენტარი ვიოლა ფონ კრამონი სოციალურ ქსელში წერს, რომ თუ საქართველო კანდიდატის სტატუსს მიიღებს, ეს იქნება ქართველი ხალხის დამსახურება:
,,თუ ევროკავშირი საქართველოს მიანიჭებს კანდიდატის სტატუსს – ეს იმიტომ კი არ იქნება, რომ ხელისულებამ და მმართველმა პარტიამ ყველა პრიორიტეტი შეასრულა, რომელიც ევროკავშირმა დაუწესა, არამედ იმიტომ, რომ ამას იმსახურებს საქართველოს მოსახლეობა და მოითხოვს გეოპოლიტიკური ლოგიკა“, – წერს ,,ტვიტერის“ ოფიციალურ გვერდზე ვიოლა ფონ კრამონი.
ავტორი
ნინი ხიჯაკაძე
