ოპოზიციის, ლიბერალების მიმართ მწვავე პოზიცია-შეფასებებით გამოდის პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე, ირაკლი ზარქუა:
“ფსევდო-ლიბერალებისა და ოპოზიციიდან ხელმოცარული ნაწილის მცდელობა რა არის, ნიშა რომ ვერ იპოვეს და არ იციან რა თემას ეცნენ და მოიგონეს რომ… რატომღაც ჰგონიათ ამ მავნებლებს, რომ მართლმადიდებლობა ეს არის დემოკრატიის მუხრუჭი. რატომ, საიდან?! ან მართლმადიდებლობა, ეკლესია და ქართული ღირებულებები არის ევროინტეგრაციისთვის შემაფერხებელი – ეს საიდან დაასკვნეს?!
ეს ხელმოცარულები რას შვებიან – იქნებ ეჩხუბონ, იქნებ ცილი დასწამონ ეკლესიას, შეუტიონ მართლმადიდებლობას, ქართული ღირებულებები საქილიკო გახადონ. რატომ, შენ დალოცვილო, რა დაგიშავა?!
პირიქით, ამ საზოგადოებაში იცხოვრე, ყველანაირი შესაძლებლობაა და ეს საქართველო სწორედ ამ მართლმადიდებლობით და ღირსებით გახდება ევროპული ოჯახის ღირსეული წევრი“, – აცხადებს ირაკლი ზარქუა.
ინფორმაციისათვის: ა.წ. 4-5 მაისს უნგრეთის დედაქალაქ ბუდაპეშტში დაგეგმილ კონსერვატიული პოლიტიკური მოქმედების კონფერენციაში (CPAC) საქართველოს პრემიერ-მინისტრის, ირაკლი ღარიბაშვილის შესაძლო მონაწილეობასთან დაკავშირებით ოპოზიციის მხრიდან მწვავე შეფასებებს, კრიტიკულ საპასუხო მწვავე პოზიცია-განმარტებებით გამოეხმაურა მმართველი პარტია.