“ყველა გადაწყვეტილებას იღებს ამ ქვეყნის ერთადერთი რეალური არაფორმალური მმართველი – ბიძინა ივანიშვილი” – ნინო გოგუაძე

პარტია ,,დროას” წევრი, ნინო გოგუაძე საგანგებო ბრიფინგზე, ერთ კონტექსტში, ემოციურ და მწვავე კრიტიკულ განცხადებას აკეთებს საქართველოს პრეზიდენტის, სალომე ზურაბიშვილის ევროპარლამენტში ჩაშლილ ვიზიტთან, პატიმრობაში მყოფი ,,მთავარი არხის” გენერალური დირექტორის, ნიკა გვარამიას შეწყალების საკითხსა და პარტია ,,ქართული ოცნების” დამფუძნებელ ბიძინა ივანიშვილთან დაკავშირებით:

,,რამდენიმე დღის წინ, საქართველოს პრეზიდენტმა ისევ არ შეიწყალა ნიკა გვარამია. ნიკა გვარამია, რომელიც 11 თვეზე მეტია უდანაშაულოდ ზის ციხეში.

საქართველოს პრეზიდენტს ეს უსამართლობა შეეძლო კანონით შეეწყვიტა, მაგრამ მან ეს არ გააკეთა, რითაც კიდევ ერთხელ დადასტურდა, რომ საქართველოში არ არსებობს ხელისუფლების არცერთი შტო, ინსტიტუტი, ფორმალური თანამდებობის პირი, რომელიც დამოუკიდებლად, სინდისისა და სამართლის მიხედვით, ქვეყნის ევროპული არჩევნის სასარგებლოდ იღებს გადაწყვეტილებას.

ყველა გადაწყვეტილებას იღებს ამ ქვეყნის ერთადერთი რეალური არაფორმალური მმართველი – ბიძინა ივანიშვილი. ყველა ინსტიტუტი და თანამდებობის პირი ემსახურება მისი სურვილების აღსრულებას.

იმავე დღეს, როდესაც სალომე ზურაბიშვილმა ნიკა გვარამია არ შეიწყალა, მან გააუქმა თავისი ვიზიტი ევროპარლამენტში, სადაც იგი სიტყვით უნდა გამოსულიყო. მას უნდა წარმოეჩინა ქართველი ხალხის ევროპული მისწრაფება, მაგრამ მან ეს ვიზიტი გააუქმა, რითაც ზურგი აქცია ქართველი ხალხის მისწრაფებას, სურვილს, რომ იცხოვროს დამოუკიდებელ, დემოკრატიულ, ევროპულ, ცივილიზებულ სახელმწიფოში”, – განაცხადა ნინო გოგუაძემ.

ავტორი
ნინი ხიჯაკაძე