7 მარტს, საპარლამენტო უმრავლესობის მიერ ე.წ. „აგენტების კანონის“ პირველი მოსმენით მიღებას დიდი ვნებათაღელვა მოჰყვა საზოგადოებაში და რუსთაველის გამზირი, პარლამენტის მიმდებარე ტერიტორია უკმაყოფილო ადამიანებით – ახალგაზრდებით, აქტივისტებით, ცნობადი სახეებით, პოლიტიკური პარტიების წარმომადგენლებით გაივსო. ყველა, განსაკუთრებით ახალგაზრდები, ძალიან ემოციურად, მწვავედ გამოხატავდა თავის დამოკიდებულებას მიღებულ გადაწყვეტილებასთან დაკავშირებით.
7-9 მარტის საპროტესტო მოძრაობა პიკში იყო, როდესაც ყოფილი სახალხო დამცველი, ნინო ლომჯარია სოციალურ ქსელში, პარტია „სტრატეგია აღმაშენებლის“ ლიდერთან, გიორგი ვაშაძესთან მიმართებაში ნეგატიურ პოსტს აქვეყნებს, რამაც ერთის მხრივ დიდი გაუგებრობა თუ უკმაყოფილება გამოიწვია ცალკეულ პოლიტიკურ პარტიებსა თუ საპროტესტო აქციის მონაწილეებში, მეორეს მხრივ კი საზოგადოებაში კონკრეტული შეკითხვები გააჩინა ლომჯარიასთან მიმართებაში.
რამდენიმე საათში აღნიშნული პოსტი ნინო ლომჯარიამ წაშალა ფეისბუქის საკუთარი გვერდიდან, თუმცა ასევე სოციალურ ქსელში მრავლად გამოქვეყნდა პოსტები თუ კომენტარები, სადაც პირდაპირ მიმართავდნენ ყოფილ სახალხო დამცველს გაეკეთებინა საჭირო განმარტებები და ამასთან, მისი მხრიდან პოსტის წაშლას ბოდიშის მოხდაც მოჰყოლოდა, გიორგი ვაშაძის მიმართ.
როდესაც არ არსებობს კონკრეტული განმარტებები, ცხადია, საზოგადოებაში ჩნდება დამატებითი შეკითხვები, რათა არ მოხდეს ფაქტთან დაკავშირებით ინტერპრეტაციები.
უცნობია, მოხდა თუ არა კომუნიკაცია ნინო ლომჯარიასა და გიორგი ვაშაძეს შორის, საჯარო სივრცეში, ამ მხრივ, არანაირი ინფორმაცია არ გავრცელებულა, არადა სასურველია არ დარჩეს პასუხგაუცემელი კითხვები, რომ შემდგომში სხვა სახის გაუგებრობებს არ ჰქონდეს ადგილი და ახალი შეკითხვები არ გაჩნდეს.