პატრიარქის ქორეპისკოპოსის, მეუფე იაკობის სკანდალურ განცხადებას ეხმიანება პრემიერ-მინისტრი გიორგი გახარია და აცხადებს, რომ მეუფის მიერ გამოთქმული მსგავსი სისულელეები საზღვარს გადაცდა:
“პირველად გავიგე რასაც მეუბნებით, ცოტა შოკირებული ვარ, მაგრამ ამის შემდეგ მახსენდება, რომ ეს მეუფე, ის მეუფეა, რომელიც იძახდა გახარია პრემიერი თუ გახდა ჩამოვაგდებო…
სერიოზული კომენტარი თუ გაინტერესებთ, პატრიარქი არის ბოლო 40 წლის განმავლობაში ამ ქვეყნის წარსულის სიმბოლო, დღევანდელი დღის სიმბოლო და მომავლის სიმბოლო სიმბოლო. და მე არაერთხელ აღვნიშნე, რომ არის ის შემაერთებელი ძალა, რომელიც ჩვენ სახელმწიფოებრიობას კრავს. შესაბამისად ამ სისულელეებზე პასუხის მოთხოვნით უხერხულ მდგომარეობაში ნუ მაყენებთ.
რატომ აკეთებს მეუფე ასეთ განცხადებებს, მეუფეს ჰკითხეთ, მას მიმართეთ, მე კიდევ ერთხელ ვიმეორებ მსგავსი სისულელეები საზღვარს გადაცდა.
ერთხელ და სამუდამოდ ამ პოლიტიკური კულტურიდან უნდა გამოვიდეთ – მეწაღემ წაღები უნდა შეკეროს, ბანკირმა ბანკს უნდა მიხედოს, მეპურემ პური უნდა გამოაცხოს და მეუფემ კიდევ ეკლესიაში უნდა იაროს და პოლიტიკას უნდა დაანებოს ყველამ თავი და ყველამ თავისი საქმე მიხედოს“, – განაცხადა გიორგი გახარიამ.