თურქეთში ძლიერი მიწისძვრა დაფიქსირდა, რის გამოც ქვეყანაში განგაშის უმაღლესი დონე გამოცხადდა. დაშავებულების და დაღუპულების ზუსტი რაოდენობა ამ დრომდე დაუდგენელია, თუმცა ვარაუდობენ, რომ დაღუპულთა რაოდენობამ შეიძლება რამდენიმე ასეული ადამიანი შეადგინოს. მიმდინარე მოვლენებთან დაკავშირებით საგანგებო განცხადებები გაკეთდა თურქეთის ხელისუფლების წარმომადგენლების მხრიდან:
,,7.8 მაგნიტუდა სერიოზულად დამანგრეველია. ახლა ყველა ჩვენი გუბერნატორი თავის სამუშაო ადგილზეა. ჟანდარმერია, პოლიცია, შეიარაღებული ძალები, განსაკუთრებულ სიტუაციათა სამსახური თურქული ,,წითელი ნახევარმთვარე“ და მაშველები მთელი ქვეყნიდან არიან მობილიზებულები შემთხვევის ადგილზე“, – განაცხადა თურქეთის შინაგან საქმეთა მინისტრნმა სულეიმან სოილუმ.
,,მიწისძვრის შედეგად, თურქეთის 10 ქალაქში, არის მსხვერპლი, გვყავს დაშავებულები და დაკარგულები.
ბოლო მონაცემებით, მიწისძვრის შედეგად 284 ადამიანი დაიღუპა, 2323 კი დაშავდა. დაკარგულების რაოდენობა ამ დრომდე ზუსტდება.
დანგრეულია 1710 საცხოვრებელი სახლი. სამაშველო სამუშაოები ინტენსურად მიმდინარეობს და ამ წუთებშიც ნანგრევებიდან ადამიანების გამოყვანა გრძელდება“, – განაცხადა თურქეთის ვიცე-პრეზიდენტმა ფუატ ოქტაიმ.
ავტორი
ნინი ხიჯაკაძე
