,,ლეიბორისტული“ პარტიის თავმჯდომარე, შალვა ნათელაშვილი პარტიის ოფისში გამართულ ბრიფინგზე განცხადებას აკეთებს მმართველი პარტიის ახალ გადაწყვეტილებაზე სამხედრო სავალდებულო სამსახურის გავლის წესის თაობაზე, სადაც ერთი წლით სამსახურის გავლის გადავადების ღირებულება გახდება 10000 ლარი.
ოპოზიციონერი ლიდერის განცხადებით, ხელისუფლების შეცვლისთანავე წარადგენენ კანონპროექტს, რომლის მიხედვითაც სამხედრო სამსახური გახდება საკონტრაქტო ნებაყოფლობითი:
,,საქართველო ერთადერთი სახელმწიფოა დედამიწის ზურგზე, სადაც ოფიციალურადაც დაკანონებულია ბატონ-ყმობა, თან ბავშვობიდან. მოგეხსენებათ, ჩვენ ქვეყანაში არცერთი თანამდებობის პირის, განსაკუთრებით ზედა ეშელონებიდან, შვილები და შვილიშვილები არ სწავლობენ ჩვეულებრივ საჯარო სკოლაში. მათთვის გახსნილია სპეციალური კოლეჯები და პანსიონები.
ასევე, არცერთი თანამდებობის პირის შვილი არ მსახურობს ჯარში. ეს ხდება ქვეყანაში, რომელსაც ტერიტორიული მთლიანობა აღსადგენი აქვს.
აი, წლის ბოლოს, ივანიშვილის ოლიგარქიულმა რეჟიმმა “გაგვახარა” ახალი გადაწყვეტილებით. კერძოდ, ჯარში იმსახურებს ყველა, გარდა იმათი, ვინც გადაიხდის 10000 ლარს.
თქვენ ახლა კარგად წარმოგიდგენიათ, რომ 10000 ლარის გადახდის შანსი ვის აქვს ჩვენს ქვეყანაში?! ხალხს ვერ უყიდია საახალწო პროდუქცია, რომ ერთი ვახშამი გააკეთოს!
ამდენად, ჩვენი შვილები მათ კვლავ სჭირდებათ ყმებად, ხოლო საკუთარ შვილებს გვიზრდიან ბატონებად!
შესაბამისად, ხელისუფლების შეცვლისთანავე ჩვენ მივიღებთ კანონს და ჯარში სამსახური გახდება საკონტრაქტო ნებაყოფლობითი. სამხედრო იერარქიაში წავა ის, ვისაც სურს თავისი ცხოვრება მიუძღვნას ამ პროფესიას და ამ სფეროს.
დღეს მთელი მსოფლიო გადასულია საკონტრაქტო სამხედრო სამსახურზე. შეერთებული შტატებიდან დაწყებული და ევროპით გაგრძელებული. სავალდებულო ჯარი დარჩა ბელარუსში, კორიაში, რუსეთში და ჩინეთში, ოღონდ იმ განსხვავეით, რომ იქ ყველა მიჰყავთ და არ არის ბატონ-ყმობა და დიფერენციაცია“, – განაცხადა შალვა ნათელაშვილმა.
ავტორი
ნინი ხიჯაკაძე
