“როდესაც ვინმე ბედავს და სახელმწიფოს აბრალებს, რომ არის მწამებელი და ადამიანის უფლებების დამრღვევი, ამ შემთხვევაში სახელმწიფო მოქმედებს გადაჭრით, დროულად და ადეკვატურად!” – რატი ბრეგაძე

იუსტიციის მინისტრმა რატი ბრეგაძემ პარლამენტში ჟურნალისტებთან კომენტარში აღნიშნა, რომ შეუსაბამოა ბრალდება თითქოს საქართველოს მე-3 პრეზიდენტს არ აქვს სამართლიანი სასამართლოს უფლება. მინისტრმა ასევე განმარტებები გააკეთა იმასთან დაკავშირებით, თუ რატომ გასაჯაროვდა კლინიკა ,,ვივამედში“ ჩაწერილი მიხეილ სააკაშვილის კადრები:

,,აქ იყო ძალიან მაღალი საზოგადოებრივი ინტერესი და ლეგიტიმური მიზანი – როდესაც ვინმე ბედავს და სახელმწიფოს აბრალებს, რომ თითქოს და სახელმწიფო არის მწამებელი და ადამიანის უფლებების დამრღვევი, ამ შემთხვევაში სახელმწიფო მოქმედებს გადაჭრით, დროულად და ადეკვატურად.

რაც შეეხება სასამართლო პროცესს, როდესაც უნდა გამართულიყო, იყო გარკვეული ტექნიკური ხარვეზი. გარდა ამისა – ჩვენმა წარმომადგენლებმა სულ რამდენიმე დღის წინ მიიღეს 5 000 გვერდზე მეტი მასალა, რომელსაც ბუნებრივია უნდა გაეცნონ, წაიკითხონ, მოამზადონ შესაბამისი არგუმენტები და პროცესი გაიმართება 22 დეკემბერს.

თითქოს და მას ვინმემ წაართვა სამართლიანი სასამართლოს უფლება – ეს იმთავითვე არის შეუსაბამო. როდესაც ვინმე ამბობს იმას, რომ თითქოსდა მას წაერთვა სამართლიანი სასამარლოს უფლება. იმიტომ, რომ პროცესი შესაძლებელი იყო, ასევე, ჩატარებულიყო უშუალოდ კლინიკაში, რაზეც მისი დაცვის მხარეც არ იყო თანახმა“, – განაცხადა რატი ბრეგაძემ.

ავტორი
ნინი ხიჯაკაძე