„დარბაზში ვერ ვხედავთ სად არის მთავარი ოპოზიცია. უკვე მერამდენე სხდომაა, არც ეკონომიკა, არც განათლება, არც ქვეყნის თავდაცვისუნარიანობა, არც ევროინტეგრაცია და ახლა უკვე არც იუსტიციის სისტემა ე.წ. მთავარ ოპოზიციას არ აინტერესებს. სინამდვილეში მათ შეეშინდათ პოლიტიკური დებატების და ზუსტად იმ საკითხზე, სადაც იმუქრებოდნენ, რომ ქარიშხალს მოგვიწყობდნენ, არსად ჩანან და ხედავთ რომ არათუ ქარიშხალი არამედ, სიოც კი არ ქრის აქეთ მიმართულებით დღეს დარბაზში“, – განაცხადა პარლამენტის თავმჯდომარის მოადგილე, არჩილ თალაკვაძემ პარლამენტის პლენარულ სხდომაზე, სადაც მინისტრის საათის ფორმატში, იუსტიციის მინისტრ რატი ბრეგაძეს მოუსმინეს.
მმართველი პარტიის ერთ-ერთმა ლიდერმა ყველა ოპოზიციონერ დეპუტატს დარბაზში შემოსვლისა და დებატებში ჩართვისკენ მოუწოდა:
„პარლამენტში პოლიტიკის ერთ-ერთი მთავარი კომპონენტი დებატებია და როდესაც დებატებს გაურბიხარ და ემალები, რაღა მთავარ ოპოზიციაზე უნდა გქონდეთ პრეტენზია“, – აღნიშნა არჩილ თალაკვაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
