კლინიკა ,,ვივამედს” მიხეილ სააკაშვილის სამედიცინო ექსპერტიზის დასკვნა ამ დრომდე არ აქვს. იმასთან დაკავშირებით, თუ ვის უნდა გადაეგზავნა აღნიშნული დოკუმენტი, მწვავე და კრიტიკული განცხადებას აკეთებს ადვოკატი შალვა ხაჭაპურიძე, რომელიც პასუხისმგებლობას პენიტენციურ სამსახურს აკისრებს:
,,გაირკვა, რომ სასამართლო შეცდომაში შეიყვანა ამ პენიტენციური სამსახურის წარმომადგენელმა. ირკვევა, რომ სააკაშვილის დოკუმენტები ,,ვივამედმა” არც კი იცის, რაზე არის საერთოდ საუბარი?!
ხალხნო, კითხვა მაქვს – რა ადეკვატურ მკურნალობაზე მიდის ამის მერე საერთოდ საუბარი?! ანუ 16 დღეა დოკუმენტები უდევთ და ექიმებისთვის არცკი მიუწოდებიათ.
ეს დოკუმენტი (სასამართლო სამედიცინო და ფსიქიატრიული კომისიური ექსპერტიზის დასკვნა N07-11/22) და პლიუს კიდე 21 ტომი, ,,ვივამედმა” არც კი იცის რომ არსებობს.
პენიტენციურ სამსახურს არ აინტერესებს სააკაშვილი მოკვდება, გადარჩენა თუ რა მოხდება! არ აინტერესებს და უპატივცემულოდ ექცევა კლინიკა ,,ვივამედს” და მის ექიმებს. გამოხატავს სამსახურეობრივ გულგრილობას. უფრო მეტიც, ჩემი აზრით, მათ მიერ ჩადენილია სისხლის სამართლის დანაშაული.
გვაქვს რამდენიმე მოთხოვნა: ერთი არის – აღიძრას სისხლის სამართლის საქმე სააკაშვილის კადრების უკანონო ჩაწერა/გავრცელებაზე იმიტომ, რომ იქ არის ეჭვი, რადგან ხმა გადახაზული არის, ხმაც იწერება – რისი უფლებაც არ გააჩნიათ.
ამის გარდა მოვითხოვეთ, აღიძრას სისხლის სამართლის საქმე იმ დეპუტატებისა და პოლიტიკოსების მიმართ, ვინც აკეთებს განცხადებებს, რომელიც ცალსახად უნდა ჩაითვალოს, როგორც სასამართლოზე ზეწოლა.
შეუჩეროდეს უფლებამოსილება იუსტიციის მინისტრს, პენიტენციური სამსახურის უფროსს, პენიტენციური სამსახურის სამედიცინო დეპარტამენტის თანამშრომელს, ვინაიდან არ არის გამორიცხული მათ მონაწილეობა ჰქონდეთ მიღებული სააკაშვილის მოწამლვის ფაქტში“, – განაცხადა შალვა ხაჭაპურიძემ.
ავტორი
ნინი ხიჯაკაძე
