,,ერთიანი ნაციონალური მოძრაობის” პოლიტიკური საბჭოს თავმჯდომარე კობა ნაყოფია ჟურნალისტებთან კომენტარს აკეთებს მიხეილ სააკაშვილის ჯანმრთელობის მძიმე მდგომარეობაზე. ოპოზიციონერი ლიდერი მწვავე შეფასებას ახდენს გავრცელებულ ინფორმაციაზე, რომ მე-3 პრეზიდენტმა საქართველოში ჩამოსვლამდე კუჭზე ოპერაცია გაიკეთა, რის გამოც ამჟამად აქვს პრობლემები და აცხადებს, რომ ყოველივე ეს კეთდება სააკაშვილის მიმართ განხორციელებული დანაშაულის გადასაფარად:
,,ეს არის გამოცხადებული სიკვდილის ქრონიკა, ხალხო!
დღეს რაც ვნახე, მიხეილ სააკაშვილი მოვინახულე და ბოლოს რომ ვიყავი, იმასთან შედარებით, გაცილებით უფრო სუსტადაა…
მისი აღნაგობა გახსოვთ, ალბათ, ყველას და ის იწონის 73 კილოს. რა კომენტარი უნდა გავაკეთო?! – უმძიმესი სურათია. ყოველდღე მას უფიქსირდება 38°C პლიუს სიცხე.
დღეს გავრცელდა ინფორმაცია, აბსოლუტური ტყუილი და სიცრუე – თითქოს მან ოპერაცია გაიკეთა წამოსვლამდე, 2021 წელს – რაც არ შეესაბამება სიმართლეს. ეს არის სიცრუე!
მე მოვუწოდებ ჯანდაცვის სამინისტროს – დაინტერესდეს ამით. მათივე ინტერესშია და ხელეწიფებათ, რომ ეს გააკეთონ სახელმწიფო დონეზე. გამოითხოვონ, თუ ასეთი კლინიკა არსებობს, სადაც მიხეილ სააკაშვილმა ოპერაცია გაიკეთა, რაც არის მორიგი “ფეიკი” და ტყუილი, რაც ჩვევია ზოგადად ზოგიერთს, არ დავასახელებ. გაასაჯაროონ და დადონ ეს დოკუმენტები.
რაც შეეხება მიხეილ სააკაშვილის ოპერაციას – ბოლო მანიპულაცია მასზე განხორციელდა დაახლოებით 6 წლის წინ – 2017 წელს. როგორი დოკუმენტიც უნდა არსებობდეს, არ არის 2021 წლის, ნამდვილად. ეს იქნება მინიმუმ 5-6 წლის წინანდელი, რაც არ დამალულა.
მოვუწოდებ კომპეტენტურ ორგანოებს, გამოიკვლიონ. საზოგადოება ნუ შეყავთ შეცდომაში! მიზანი არის ძალიან მარტივი – გადაფარონ მისი წამების, მოწამვლის ფაქტები. მიზეზებს ეძებენ, თითქოს მიხეილ სააკაშვილის ჯანმრთელობის მდგომარეობა არის გამოწვეული ჰიპოთეტური, მოგონილი ოპერაციით – რაც არის ტყუილი, სიცრუე!“, – განაცხადა კობა ნაყოფიამ.
ინფორმაციისთვის: “ქართული დასის” თავმჯდომარე ჯონდი ბარათურიამ, ტელეკომპანია იმედის გადაცემაში “IMEDI LIVE” განაცხადა, რომ “ავსტრიის დედაქალაქ ვენაში, [საქართველოში] ჩამოსვლამდე ერთი თვით ადრე გაიკეთა კუჭის რეზექცია. ადამიანები, ვისაც ჭარბი წონა აქვთ, კუჭს იპატარავებენ იმისთვის, რომ ცოტა ჭამონ და დასუსტდნენ“.
ავტორი
ნინი ხიჯაკაძე
