“Hub Georgia“-ს დამფუძნებელი განცხადებას ავრცელებს ანაკლიის ღრმაწყლიან პორტთან დაკავშირებით. გიორგი კოდუა, ორგანიზაციის სახელით, მხარს უჭერს აღნიშნული პროექტის განხორციელების იდეას და ხელისუფლებასაც ურჩევს უფრო მეტად მოახდინოს ამ უმნიშვნელოვანესი საქმის მხარდაჭერა:
“ჩვენი ორგანიზაცია ორიენტირებულია საქართველოს კეთილდღეობაზე. ისეთი მეგაპროექტების განხორციელება, როგორიცაა ანაკლიის ღრმაწყლიანი პორტის მშენებლობა, წარმოადგენს დიდ ნაბიჯს ეკონომიკური დამოუკიდებლობისკენ. აქედან გამომდინარე ჩვენი ორგანიზაცია მხარს უჭერს ამ პროექტის განხორციელების იდეას.
ისეთი მეგაპროექტები, როგორიც არის ანაკლიის ღრმაწყლიანი პორტის განხორციელება, გათვლილია გრძელვადიან პერიოდზე. ეს არის სფერო, რომელიც საჭიროებს სტაბილურობას, რისკების გათვალისწინებას, ვინაიდან წარმოადგენს ქვეყნის ეკონომიკური სტაბილურობისა და დამოუკიდებლობის ერთერთ განმსაზღვრელ ვექტორს.
მივესალმებით EBRD-ის განცხადებას ამ პროექტის თანადაფინანსებისათვის მზადყოფნის შესახებ. EBRD არის ერთერთი 4 ბანკიდან, რომელიც მზადაა დააფინანსოს ანკლიის პროექტი 100 მილიონი დოლარით.
არის საშიშროება, ანაკლიის პოტენციური მომხმარებელი შევიდეს კოლაბორაციაში სხვა პორტთან. ვინაიდან ნოვოროსიისკის პორტის ლიმიტი არ არის დამაკმაყოფილებელი ასეთი მასშტაბური ტვირთბრუნვისთვის, რუსეთის სახელმწიფომ დაიწყო ტამანის პორტის მშენებლობა, რომლის მიზანია ევროპიდან აზიაში და პირიქით ტვირთის გადაზიდვა და მნიშვნელოვანი კონკურენციის გაწევა ანაკლიის პორტის მიმართ. ვითარება არის მძიმე, ვინაიდან ტამანის პორტის მშენებლობა დაწყებულია, საჭიროა განისაზღვროს ანაკლიის პორტის პროექტის ვადები და მოხდეს მისი სწაფად რეალიზება. იმ შემთხვევაში, თუ ტამანის პორტის პროექტის დასრულება მოხდება ანაკლიის პროექტის სრულყოფაში მოყვანამდე, ძალიან რთული იქნება უკვე ტამანის პორტის მომხმარებლის მოზიდვა და გადმობირება.
ამ ვითარებიდან გამომდინარე, იმისათვის, რომ ანაკლიის პოტენციურმა მომხმარებელმა არ მოახდინოს შეთანხმება კონკურენტ, ტამანის პორტთან, აუცილებლად უნდა განისაზღვროს თაიმლაინები და მოხდეს პროექტის წარმატებული რეალიზება.
მიუხედავად საქართველოს მთავრობის მიერ მრავალი დადებითი განცხადებისა ანაკლიის პორტის რეალიზების შესახებ, სახეზე არ არის საპასუხო რეაგირება ამ საკითხთან დაკავშირებით. ინვესტორ ბანკებს არ უნდა უწევდეთ საკუთარი მზაობის შესახებ განცხადების მრავალჯერ გაკეთება.
საქართველოს მთავრობას ვურჩევთ, ლოკალური კონფლიქტის ნაცვლად, ყველა სტრუქტურამ დაუჭიროს მხარი ამ პროექტის განხორციელებას. იმისათვის, რომ კითხვის ნიშნები ამ პროექტის მზაობასთან დაკავშირებით იქნეს აღმოფხვრილი, მათ უნდა გადადგან პირველი ნაბიჯი, დააფინანსონ პროექტის პირველი ფაზა, რითაც დაუდასტურებს ინვესტორებსა და საზოგადოებას საკუთარ მზაობას საქმით. ეს ყველაფერი ხელს შეუწყობს პროექტის მდგრადობას რაც მომავალში უზრუნველყოფს ინვესტორების მოზიდვას“, – აცხადებს გიორგი კოდუა.
