,, ევროპული საქართველოს თავმჯდომარე გიგა ბოკერია პოლიტიკურ შეფასებას აკეთებს აშშ-ის სახელმწიფო დეპარტამენტის პრესსპიკერის, ნედ პრაისის მწვავე განცხადებაზე:
,,ეს გზავნილი ასახავს იმ რეალობას, რაც გვაქვს. ჩვენს ნაცვლად არავინ არ იზრუნებს ჩვენი ქვეყნის მომავალზე.
ჩვენ, ვისაც გვსურს ამ ქვეყნის თავისუფალი და უსაფრთხო მომავალი, რომელიც არის უმრავლესობა ამ ქვეყანაში, უნდა მოვიკრიბოთ ძალა და შევძლოთ ამ რეჟიმის შეცვლა, დამარცხება იმათი, ვისაც უნდა, რომ ამ საბჭოთა, პუტინისტურ ჭაობში ვიყოთ და თაობები შესწიროს ამას.
ამას თუ ვიზამთ, ჩვენ გვექნება თავისუფალი სამყაროს მხარდაჭერა. თუ არა, მაშინ ამ ფასს გადაიხდის შემდეგი თაობები, ისევე როგორც ეს ვიხილეთ 90-იან წლებში, დღემდე“, – განაცხადა გოგა ბოკერიამ.
ინფორმაციისთვის, აშშ-ის სახელმწიფო დეპარტამენტის პრესსპიკერის, ნედ პრაისმა მწვავე შეფასება გააკეთა საქართველოში რეფორმების გატარების მიმართულებით:
,,ჩვენ გამოვთქვით შეშფოთება რამდენიმე განცხადების გამო, რომელიც, როგორც მოვისმინეთ, მომდინარეობს საქართველოს პოლიტიკური სისტემისა და საზოგადოების გარკვეული ნაწილისგან. ასევე, გამოვთქვით შეშფოთება მთავრობის ზოგიერთი ქმედების გამო.
ამ ქმედებებმა, მათ შორის, მნიშვნელოვანი დემოკრატიული რეფორმების შეჩერებამ ან უკან დახევამ შექმნა რეგრესი ევროკავშირის წევრობისკენ ქართველი ხალხის მკაფიო სწრაფვასა და ზოგადად ევროატლანტიკურ მისწრაფებებში.
ამ ქმედებების გამო ჩვენ შეშფოთებულები ვართ, რადგან ამან ასევე გააღრმავა პოლარიზაცია საქართველოს საზოგადოებაში ნაცვლად იმისა, რომ ევროატლანტიკური ინტეგრაციის ძირითადი საკითხების გარშემო გაერთიანება მომხდარიყო.
საქართველოში არის პოლარიზაციის ისეთი დონე, რომელიც ქვეყნისთვის სასარგებლო ვერ იქნება. ყოველივე ამის შემდეგ, ჩვენ კვლავაც მოწოდებულნი ვართ ვიმუშაოთ საქართველოსთან ერთად იმ რეფორმების შესასრულებლად, რომლებიც საჭიროა ევროატლანტიკური მიზნების მისაღწევად.
ჩვენ მოვუწოდებთ საქართველოს აჩვენოს თავისი ერთგულება ევროკავშირში ინტეგრაციისადმი იმ რეფორმების გატარებით, რომლებიც აუცილებლია ამ გზაზე წინსვლისთვის“, – განაცხადა ნედ პრაისმა.
ავტორი
ნინი ხიჯაკაძე
