ჩხოროწყუში არსებულ მოუწესრიგებელ საგზაო ინფრასტრუქტურაზე საუბრობს პარტია “სტრატეგია აღმაშენებლის” ჩხოროწყუს რაიონული ორგანიზაციის ხელმძღვანელი, მაკა შენგელია და აქედან გამომდინარე მძღოლების პრობლემებზე ამახვილებს ყურადღებას:
“საქართველოში ავტომობილის ტექდათვალიერება მძღოლებისთვის სავალდებულო რომ გახადეს უკვე ვიცით. ინფლაციის შედეგად გაძვირებული ფასები საწვავზე, ავტომობილის ნაწილებზე და ზოგადად ყველაფერზე ესეც არახალია. ადგილობრივი მძღოლები, რომლებიც საკუთარი ავტომობილით ცდილობენ ოჯახის რჩენას, სულ უფრო ხშირად წუწუნებენ ჩხოროწყუში არსებული ავარიული, გაუბედურებული გზების გამო. ქალაქის ცენტრალურ ნაწილში ადგილი არ არის დარჩენილი, სადაც არ იყოს უზარმაზარი ორმო, რომელისთვისაც ავტომობილს დაზიანების გარეშე გვერდის ავლა შეეძლოს, რიგ შემთხვევებში კი დაზიანება საკმაოდ სერიოზულიცაა. ხოლო, კანონით დადგენილ ვადაში, ავტომობილი თუ ვერ გაივლის ტექინსპექტირებას, მძღოლი ადმინისტრაციული წესით ჯარიმდება.
თვითმმართველობის დაუდევრობის და ბიუჯეტის არამიზნობრივად დაგეგმის გამო, უყურადღებოდაა დატოვებული დაზარალებულ მოქალაქეების პრობლემები, კომპენსაციაზე ზედმეტია საუბარიც.
მუნიციპალუტეტს 10 254 000 ლარამდეა აქვს ბიუჯეტი და აქედან 4 581 400 ლარი მიდის ხელფასებში. დარჩენილი თანხა კი ქალაქის წინაშე არსებულ გამოწვევებს და პრობლემებს არ ჰყოფნის მოსაგვარებლად. მით უფრო, როცა ჩხოროწყუს ბიუჯეტით ქალაქის შიდა გზების რეაბილიტაციისთვის ერთი თეთრიც არაა წელს გამოყოფილი.
შესაბამისად, ქალაქი დანგრეული გზებით, გუბეებითა და სხვა პრობლემებითაა სავსე, თვითმმართველობა კი არაფრისმკეთებელი პარტიული აქტივისტებით გადავსებული.
სოფლის მხარდაჭერის პროგრამა აფინანსებს სასოფლო გზებს, ცენტრალურ ნაწილს არ გამოუჩნდა დამფინანსებელი, ბიუჯეტი კი ძლივს ჰყოფნის “ოცნების” საარჩევნო ხმების შენარჩუნებას. ასეთი პოლიტიკის შენარჩუნებას მთლიანად მუნიციპალიტეტის გაღარიბება მოჰყვება, საბოლოო ჯამში კი – ქვეყნის“, – აცხადებს მაკა შენგელია.
