ევროსაბჭოს საპარლამენტო რეზოლუციას რუსეთის ტერორისტულ სახელმწიფოდ გამოცხადებასთან დაკავშირებით, მმართველი პარტია მხარს არ უჭირს იმის გამო, რომ რეზოლუციაში ერთ-ერთი ჩანაწერი ეთმობა საქართველოს მე-3 პრეზიდენტის, მიხეილ სააკაშვილის საკითხს.
ხოლო, არის თუ არა რუსეთი ტერორისტული სახელმწიფო – ჟურნალისტებთან კონკრეტული პოზიციას არ აფიქსირებს პარტია ,,ქართული ოცნების” თავმჯდომარე ირაკლი კობახიძე:
,,ჯერ-ჯერობით ასეთი გადაწყვეტილება არ მიუღია ჩვენს მთავარ სტრატეგიულ პარტნიორებს. ასეთ პირობებში ჩვენი მხრიდან ამ საკითხის ინიცირება არ იქნება სწორი.
ჩვენ დაველოდებით საერთაშორისო თანამეგობრობის პოზიციას. ვნახოთ, იმის მერე შეიძლება სხვადასხვა საკითხზე მსჯელობა. თუმცა საერთაშორისო თანამეგობრობას ამ თემაზე ჯერ-ჯერობით არავითარი პოზიცია არ დაუფიქსირებია.
ჩვენ სულისკვეთებაზე ვერ ვისაუბრებთ – აქ საუბარია ოფიციალურ შეფასებაზე. მე არ ვარ რიგითი მოქალაქე, რომელმაც საკუთარ სულისკვეთებაზე შეიძლება ისაუბროს. მე ვსაუბრობ მმართველი პარტიის სახელით.
მე ვერ ვისაუბრებ ჩემ სულისკვეთებაზე. როდესაც სახელმწიფოს ექნება პოზიცია, ეს პოზიცია იქნება ასახული შესაბამის დოკუმენტში. მარტივად არის აქ საქმე“, – განაცხადა ირაკლი კობახიძემ.
ავტორი
ნინი ხიჯაკაძე
