“სახელმწიფომ პატიმრის ჯანმრთელობის განსაკუთრებით მძიმე მდგომარეობიდან გამომდინარე უნდა განიხილოს სასჯელის გადავადების საკითხი” – ალეკო ცქიტიშვილი

ადამიანის უფლებათა ცენტრმა დღეს გამოაქვეყნა ანალიტიკური დოკუმენტი – ,,პატიმრის უფლება ჯანდაცვაზე – მიხეილ სააკაშვილის წინააღმდეგ მიმდინარე სასამართლო პროცესის და თანმდევი მოვლენების ანალიზი’’. აღნიშნულთან დაკავშირებით, ცენტრის აღმასრულებელი დირექტორი ალეკო ცქიტიშვილი, ტელეკომპანია “მტავარი არხის” ჟურნალისტთან შეფასებას აკეთებს საქართველოს მე-3 პრეზიდენტის მიხეილ სააკაშვილის საქმესთან დაკავშირებით. მისი განცხადებით, საქართველოს პრაქტიკაში მოიძებნება ისეთი მაგალითი, როდესაც მოხდა სასჯელის გადავადება და პატიმრის საზღვარგარეთ სამკურნალოდ გადაყვანა:

,,სახელმწიფომ, პატიმრის ჯანმრთელობის განსაკუთრებით მძიმე მდგომარეობიდან გამომდინარე, უნდა განიხილოს სასჯელის გადავადების საკითხი და ასევე, შესაძლებელია უცხოეთში პრეზიდენტის მკურნალობის საკითხის განხილვაც. სწორედ იმ სასჯელის გადავადების პერიოდში.

ჩვენ გვაქვს გამოცდილება. კონკრეტულად, ამ ანალიტიკურ დოკუმენტშიც არის ასახული, როდესაც ჩვენი ერთ-ერთი ბენეფიციარი ასევე გამოვიდა მძიმე მდგომარეობიდან გამომდინარე, საპატიმრო დაწესებულებიდან – სწორედ სასჯელის გადავადების შესაძლებლობით. მან იმკურნალა ჯერ საქართველოში – როგორც მახსოვს, მაგრამ ვინაიდან საქართველოში არ იყო მკურნალობა ეფექტიანი, მან საფრანგეთში გააგრძელა მკურნალობა. შემდეგ ჩვეულებრივ დაბრუნდა.

სრულიად შესაძლებელია მსგავსი მიმართულებით იმუშაოს სახელმწიფომ და არ იყოს პრეზიდენტი დისკრიმინაციულ მდგომარეობაში“, – განაცხადა ალეკო ცქიტიშვილმა.

ავტორი
ნინი ხიჯაკაძე