“რაიონის დღევანდელ ხელმძღვანელობას ხალხის პრობლემები არ აინტერესებს, მათი მთავარი საზრუნავი კორუმპირებულების ოჯახის წევრებისა და ახლობლების დასაქმებაა” – ზაზა ვანაძე ხულოს რაიონში არსებულ პრობლემებზე

რაიონში არსებული პრობლემები და უკმაყოფილო მოსახლეობა. ხულოს მუნიციპალიტეტის საკრებულოს წევრი, პარტია “სტრატეგია აღმაშენებლის” რაიონული ორგანიზაციის ხელმძღვანელი ზაზა ვანაძე სააგენტო “პარალელთან” იმ პრობლემებზე საუბრობს, რაც წლების განმავლობაში აწუხებს ადგილობრივ მოსახლეობას:

“მრავლადაა ხულოს მუნიციპალიტეტში პრობლემები, თუმცა ეს მმართველ პარტიას არ აღელვებს – ადგილობრივ ხელისუფლებაში მოკალათებულები, რომლებმაც ჯერ აბაშიძის მმართველობის დროს გამოხრეს ბიუჟეტი, შემდეგ სააკაშვილის და ახლა დაპორტირებულები პრორუსულ “ქართული ოცნებაში”, საქმის კეთების ნაცვლად რაიონის ბიუჯეტის ხვრას აგრძელებენ. წლების განმავლობაში, არაერთი ხელისუფლება შეიცვალა ხულოს რაიონში, თუმცა არცერთი პრობლემა პრაქტიკულად არ მოგვარებულა.

გაგაცნობთ ხულოს რაიონულ ცენტრსა თუ  სოფლებში, მოსახლეობის წინაშე, წლების განმავლობაში არსებულ ძირითად პრობლემებს:

პირველი – შიდა გზები არის მოუწესრიგებელი და ადგილობრივ მაცხოვრებლებს გადაადგილება უჭირთ.

მეორე – ინფრასტრუქტურა საერთოდ არ არსებობს მუნიციპალიტეტის ცენტრალურ ნაწილში. არ არსებობს მოსაცდელები, რაზეც ძალიან სწუხს მოსახლეობა. არ არის მოწესრიგებული სანიაღვრე და საკანალიზაციო არხები, რაც ხშირად იწვევს მეწყრულ პროცესებს.

ძალიან ბევრი სოფელი დარჩენილია უწყლოდ და არ იციან ზამთარი როგორ გადაიტანონ. ამ პირობებში, მათი არასწორი მართველობით, არასწორი პრიორიტეტების დაგეგმებით 49 ტენდერი ჩავარდა სამწუხაროდ ისეთ რაიონში, როგორიცაა ხულო, სადაც ოდითგანვე იდგა და დღემდე დგას ეს პრობლემა, არცერთმა ხელისუფალმა არ იზრუნა მისი გადაჭრის გზებზე.

რაიონის დღევანდელ ხელმძღვანელობას კი ხალხის პრობლემები არ აინტერესებს, მათი მთავარი საზრუნავი კორუმპირებულების ოჯახის წევრებისა, ახლობლების დასაქმებაა და რუსული ოცნების აქტივისტებითა გადაჭედილები სიპები თუ აიპები, იფლანგება ხალხის ფულები, რომლითაც ის პრობლემები უნდა მოგვარდეს, რაც ზემოთაა ჩამოთვლილი,” – აცხადებს ზაზა ვანაძე.