“5 წლიანი ვადა ბოლომდე გავიყვანე ისე, რომ ბევრი კრიტიკა მომისმენია, მაგრამ არავის უთქვამს, რომ სახალხო დამცველი არ არის დამოუკიდებელი ინსტიტუტი” – ნინო ლომჯარია

სახალხო დამცველის ბოლო ანგარიშს საკანონმდებლო ორგანოში უსმენდნენ. ნინო ლომჯარიამ ვრცლად და მწვავედ ისაუბრა ქვეყანაში ბოლო პერიოდში განვითარებულ მოვლენებთან დაკავშირებით. ანგარიშის წარდგენის შემდეგ ომბუდსმენმა შეაჯამა მისი თანამდებობაზე ყოფნის პერიოდი:

,,სახალხო დამცველი საკმაოდ მწვავე იყო იმ ვითარების შეფასებაში, რასაც ბოლო წლების განმავლობაში ჰქონდა ადგილი ქვეყანაში. ბუნებრივია, ეს პოლიტიკურად არ არის მისაღები მათთვის.

ალბათ ისინი ამ ფორმით ცდილობენ, რომ გარკვეულწილად თავდაცვის პოზიციაში დგანან. მათ ალბათ მიაჩნიათ, რომ სახალხო დამცველზე თავდასხმით ის პრობლემები, რაზეც ჩვენ ვსაუბრობთ, სადღაც გაქრება და საზოგადოება ამ პრობლემებს ვერ დაინახავს.

არანაირად არ მეუხერხულება ის, რომ ვიყავი და ვიქნები დარჩენილ ვადაში, მათ შორის, საქართველოს მე-3 პრეზიდენტის უფლებათა დამცველი, ასევე – იმ ადამიანის უფლებების დამცველი, რომლებიც მათ ხელისუფლებას წარმოადგენდნენ.

5 წლიანი ვადა ბოლომდე გავიყვანე ისე, რომ ბევრი კრიტიკა მომისმენია, მაგრამ არავის უთქვამს, რომ სახალხო დამცველი არ არის დამოუკიდებელი ინსტიტუტი. ვფიქრობ, რომ ეს არის მთავარი მიღწევა ჩვენი ინსტიტუტის,“ – განაცხადა ნინო ლომჯარიამ.

ავტორი
ნინი ხიჯაკაძე