“მიხეილ სააკაშვილს დარღვეული აქვს კოორდინაციის უნარი, უჭირს მეტყველება, თავს გრძნობს სუსტად, იმყოფება მწოლიარე მდგომარეობაში – თქვა სამედიცინო დაწესებულებამ” – შოთა თუთბერიძე

საქართველოს მე-3 პრეზიდენტის სასამართლო პროცესის კლინიკა ,,ვივამედში” გამართვის გადაწყვეტილება მიიღო სასამართლომ. ადვოკატი შოთა თუთბერიძე მიზანშეუწონლად მიიჩნევდა ამ პროცესის ჩატარებას, რადგანაც მისი განმარტებით, მიხეილ სააკაშვილის ჯანმრთელობის მდგომარეობა ამ ეტაპზე არის მძიმე:

,,არცერთ ექიმს, არცერთ სამედიცინო დაწესებულებას არ უთქვამს, რომ მიხეილ სააკაშვილი არის კარგად და თავს გრძნობს კარგად.

სამედიცინო დაწესებულებამ აღნიშნა და თქვა, რომ მიხეილ სააკაშვილს დარღვეული აქვს კოორდინაციის უნარი, უჭირს მეტყველება, თავს გრძნობს სუსტად, იმყოფება მწოლიარე მდგომარეობაში და თქვა, რომ თუ ჩატარდება გამოკითხვა, ეს უნდა ჩატარდეს აუცილებლად ექიმების მეთვალყურეობის ქვეშ.

ეს გვითხრა სამედიცინო დაწესებულებამ. მიუხედავად იმისა, რომ კლინიკა ,,ვივამედზე”, ჩემი ინფორმაციით, არის ძალიან დიდი წნეხი უკვე თვეების განმავლობაში იმასთან დაკავშირებით, რომ მათ მიხეილ სააკაშვილის მდგომარეობა შეეფასებინათ დადებითად, მათ ამას ვერ მიაღწიეს.

ახლა ბუნებრივია შეეცდებიან დღევანდელი წერილის თარგმნას საზოგადოებისთვის იმგვარად, რომ საავადმყოფომ თქვას, რომ სააკაშვილი კარგად არის. ეს ასე არ არის!”, – განაცხადა შოთა თუთბერიძემ.

ავტორი
ნინი ხიჯაკაძე