“შენების მოძრაობის” ლიდერი, პარლამენტის ყოფილი თავმჯდომარე “ქართული ოცნების” თავმჯდომარის ბიძინა ივანიშვილის საკადრო გადაწყვეტილებასთან დაკავშირებით საკუთარ პოზიციას აფიქსირებს “საზოგადოებრივ არხთან” ინტერვიუში:
„ივანიშვილმა შექმნა საარჩევნო, ცივი ომის მთავრობა. ეს არ არის ქვეყნის მართვის გამიზნული მთავრობა, ეს არის პრაქტიკულად საარჩევნო შტაბი. ამას სხვა ანალიზი არ უხდება. მან გაამაგრა ძალოვანი სტრუქტურები, რომლებიც დამნაშავესთან და მტერთან საბრძოლველადაა მოგონილი და საზოგადოების მინიმუმ ნახევარს უთხრა, რომ მე აღიქვამთ დამნაშავედ და მტრად. სხვა პოზიტიური, გაკეთებული და იმედის მომცემი მას აღარაფერი შეუძლია, შესთავაზოს საზოგადოებას.
გახარიას დანიშვნის მეორე ასპექტია ის, რომ ძნელად მოიძებნებოდა სხვა კანდიდატი, რომელიც შეძლებდა ამ დონეზე გაეღიზიანებინა საზოგადოების ის ნაწილი, რომელიც ოცნების ამომრჩეველი არ არის. ივანიშვილის ინტერესიც ზუსტად ეს არის, რაც შეიძლება მეტად გააღიზიანოს ყველა, ვინც მისი მხარდამჭერი არ არის და ემოციურ ფონზე მოიპოვოს უპირატესობა ამ მაღალტემპერატურიან, სამოქალაქო დაპირისპირებაში.
როცა ზოგადად ლიდერი, ამ შემთხვევაში, ივანიშვილი ასე ცინიკურ ნაბიჯს დგამს, ამას მოჰყვება მღელვარება, გაბრაზება და იმ უფსკრულის კიდევ უფრო გაღრმავება, რაც ნათლად ვნახეთ საპრეზიდენტო არჩევნების მეორე ტურის პერიოდში, ანუ საზოგადოების გამთლიანების ნაცვლად, რაც ივანიშვილის მთავარი ამოცანა და დაპირება იყო, ეს უფსკრული კიდევ უფრო გაფართოვდა“, – განაცხადა დავით უსუფაშვილმა.
