“მოვუწოდებთ პრეზიდენტს, გაუმჭვირვალე და ფორმალური პროცესით შერჩეული არცერთი კანდიდატი არ წარუდგინოს პარლამენტს” – პარტია “სტრატეგია აღმაშენებელი” ცესკოს თავმჯდომარისა და წევრის კანდიდატურებთან დაკავშირებით

ცესკოს თავმჯდომარისა და წევრების ვაკანტურ პოზიციებზე წარდგენილ კანდიდატურებთან დაკავშირებით განცხადებას ავრცელებს პარტია “სტრატეგია აღმაშენებელი”:

“საჯარო გახდა კანდიდატთა სია ცენტრალური საარჩევნო კომისიის თავმჯდომარის და წევრების ვაკანტურ პოზიციებზე.

პრეზიდენტს საქართველოს კონსტიტუციითა და კანონმდებლობით აქვს ვალდებულება, რომ ფორმალურად კი არ მიუდგეს ცენტრალური კომისიის წევრებისა და თავმჯდომარის შერჩევის საკითხს, არამედ დამოუკიდებელი შესარჩევი კომისიით, 19 აპრილის შეთანხმების პირობების დაცვით, საერთო კონსესუსით, შეარჩიოს ნამდვილად მიუკერძოებელი კანდიდატები, რომ გვყავდეს რეალურად თავისუფალი, დამოუკიდებელი ადმინისტრაცია და გაიზარდოს ნდობა არჩევნების მიმართ.

პრეზიდენტმა უნდა იცოდეს, რომ მისი ფორმალისტური მიდგომა ამ პროცესის მიმართ არ ამცირებს, პირიქით, ზრდის მის პასუხისმგებლობას სამართლიანი არჩევნების და ხელისუფლების მშვიდობიანად, არჩევნების გზით გადაცემისთვის, რისთვისაც ხელსაყრელ პირობებს ნამდვილად არ ქმნის მმართველი პარტიის მიერ ერთპარტიულად დანიშნული ცენტრალური საარჩევნო კომისიის წევრებისა და თავმჯდომარის მესამეჯერ პარლამენტისთვის წარდგენა.

ამასთან, სუს-ის ყოფილი მაღალჩინოსნის, იოსებ გოგაშვილის ფაილებმა კიდევ ერთხელ დაადასტურა თუ რა მასშტაბის, როგორი ტოტალური იყო და არის საარჩევნო მანიპულაცია და ამომრჩევლის თავისუფალ ნებაზე ზემოქმედება.

სწორედ ამიტომ, მოვუწოდებთ პრეზიდენტს, გაუმჭვირვალე და ფორმალური პროცესით შერჩეული არცერთი კანდიდატი არ წარუდგინოს პარლამენტს და მოხდეს ახალი, სამართლიანი პირობებით არჩეული, კონსესუსზე დაფუძნებული, დამოუკიდებელი და მიუკერძოებელი კონკურსანტების შეთავაზება პარლამენტისთვის”, – ნათქვამია “სტრატეგია აღმაშენებლის” განცხადებაში.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს