ლარის გაუფასურებაზე საუბრისას ვიცე-პრემიერი, რეგიონალური განვითარებისა და ინფრასტრუქტურის მინისტრი, მაია ცქიტიშვილი, თავისი თანაგუნდელების მსგავსად, თითს ოპოზიციისკენ იშვერს და კონკრეტულ მიზეზებს ასახელებს:
“გადატრიალების მცდელობების, პოლიტიკური დესტაბილიზაციის, პარლამენტში შევარდნის, შემდგომში, პირდაპირი ეთერიდან, მეზობელი ქვეყნის პირველი პირების გინების და ამის შედეგად ტურიზმზე დაწესებული სანქციებით, მილიონ ნახევარი ტურისტის პრაქტიკულად დაკარგვით, ამ ყველაფერის შედეგად ჩვენ ვიღებთ იმ სურათს რა სურათსაც ვიღებთ დღეს და როდესაც ჩვენი სკანდალური ექსპერტები საუბრობენ იმაზე, რომ სახელმწიფოს თითქოს არ აქვს პროგრამა, რა თქმა უნდა ტყუილია, ელემენტარულად არ მომერიდება ამის თქმა, იმიტომ რომ სახელმწიფოს ყველა ქმედება მიმართულია იმისთვის, რომ ჩვენი ბიზნესი, ჩვენი გლეხები, ჩვენი მეწარმეები გაძლიერდნენ. ვუწყობთ ხელს ყველა პროგრამით იმისთვის, რომ მათ შექმნან როგორც საწარმო შესაძლებლობები, გაყიდონ პროდუქცია, მოიზიდონ ტურისტი, ააშენონ სასტუმროები და ამით შემოიტანონ ჩვენს ეკონომიკაში უცხოური ვალუტა და ამით გავაძლიეროთ ლარი. ყველაფერი ეს ფუჭია, მაშინ როდესაც გარკვეული რადიკალური ოპოზიცია “ნაციონალური მოძრაობა” და მასთან დაკავშირებული პოლიტიკური ძალები აკეთებენ ყველაფერს იმისთვის, რომ ამ პროცესს შეუშალონ ხელი და მუდმივ რეჟიმში ვიმყოფებოდეთ რევოლუციების და გადატრიალებების ჭიდილში” – აცხადებს მინისტრი.
ვიცე-პრემიერის პრეტენზია “ნაციონალური მოძრაობისა” და “რუსთავი 2”-ის მისამართითაც გაისმა, აღნიშნული ტელეკომპანიის ჟურნალისტის შეკითხვაზე პასუხის გაცემისას:
“ხელისუფლება სტაბილურობის და სახელმწიფო ინსტიტუციების და სახელმწიფოს გამართული მუშაობის შენარჩუნებით იყო დაკავებული და ამის გაკეთება უწევდა მას შემდეგ, რაც “ნაციონალურმა მოძრაობამ” და უშუალოდ თქვენმა ტელეკომპანიამაც და თქვენი ტელეკომპანიის ჟურნალისტებმა, პირდაპირ ეთერში ეცადნენ, კიდევ ერთხელ, ამ სტაბილურობის დარღვევა და საქართველოს მთავრობა ამ პერიოდის განმავლობაში ცდილობს შეინარჩუნოს ის ურთიერთობები, თუნდაც, რომელიც არსებობს, რომელიც ამ წლების განმავლობაში იმ პრაგმატული პოლიტიკის შედეგად რთულად მიღწევადი იყო და ძალიან რთულად მოსაძიებელი იყო ის გაყიდვები, ის ტურისტები, რომლებიც ჩვენ ჩვენს ქვეყანაში გვყავდა“.
